Merr flakë autobusi në Kosovë

Një autobus i kompanisë “Arditi Tours” në Kosovë është përfshirë nga flakët.

Sipas policisë, rasti ka ndodhur rreth orës 17:30, në zonën industriale në Fushë Kosovës.

Zëdhënësi i Policisë, Agron Borovci ka thënë se nuk është raportuar për të lënduar.

Në vendin e ngjarjes janë edhe zjarrfikësit.

“Rreth orës 17:30, është raportuar se  në zonën industriale në Fushë Kosovë, një autobus është përfshirë nga zjarri.  Policia menjëherë ka dalë në vendin e ngjarjes, po ashtu janë ftuar edhe zjarrfikësit.  Nuk raportohet për të lënduar, përderisa po  trajtohen rrethanat e ngjarjes”, ka thënë Borovci.

Një nga përfaqësuesit e kompanisë ka konfirmuar për Express, se autobusi i djegur i përket kësaj kompanie.

Ai tha se nuk ka të lënduar nga ky incident dhe se brenda autobusit nuk ka qenë askush.

Sipas tij, shkaku i zjarrit ende nuk dihet.

“Po është i kompanisë. Nuk e dimë njëherë shkaktarin se pse ka ndodhur. Brenda nuk ka qenë askush dhe nuk ka të lënduar”, ka thënë një nga përfaqësuesit e kësaj kompanie.