Kryeministri Albin Kurti, në mbledhjen e Këshillit të Përgjithshëm Vetëvendosjes, ka folur lidhur për sulmet e 24 shtatorit nga një grup terroist serb ku humbi jetën një efektiv i policisë së Kosovës dhe u plagos një tjetër.
Kurti kërkoi nga Serbia që të ekstradohen terroristët që ikën nga mali, ndërsa për ndërkombëtarët kërkoi që dy organizatat veriore “Mbrojtja Civile” dhe “Brigada e Veriut” të shpallen terroriste.
“Në Republikën tonë nuk ka vend për terroristë, përveçse para drejtësisë. Ne kërkojmë që ata që kanë ikur tinëz malit e që janë strehuar nga Serbia, të ekstradohen në Kosovë sa më parë. Gjithashtu, organizatat ‘Mbrojtja Civile’ dhe ‘Brigada e Veriut’ tashmë ka prova e argumente të mjaftueshme të shpallen organizata terroriste edhe nga shtetet tona mike, partnere dhe aleate, ashtu si ne tashmë bëmë në mbledhjen e Qeverisë së Republikës së Kosovës para 3 muajsh”, vijoi Kurti.
Ndërkohë, sa i përket ruajtjes së kufirit, Kurti tha se ekziston një zotim që Forca e Sigurisë së Kosovës nuk do të shkojë atje, prandaj kërkojnë që ky vakum të mbulohet nga forcat e NATO-s.
“Vigjilenca dhe gatishmëria jonë në pjesën veriore të Republikës është dëshmuar që nga dita e parë e qeverisjes sonë. Është zotimi i njëanshëm ndaj NATO-s i një pararendësi tim që nuk lejon FSK-në të futet në veri, por kufiri ynë duhet të ruhet. Ky vakum që është atje duhet të mbushet, dhe për këtë jemi duke shtuar bashkëpunimin me aleatët tanë ndërkombëtar e ata praninë e NATO-s, KFOR-it atje. Për këtë akt të agresionit të Republikës sonë, Serbia duhet të ndëshkohet ndërkombëtarisht sepse sa herë që ajo nuk është ndëshkuar për krimet e saj, i ka përsëritur ato dhe kjo nuk duhet lejuar”, deklaroi Kurti.
Discussion about this post