Ministri i Mbrojtjes së Serbisë Millosh Vuçeviç ka provokuar gjatë një konference për media këtë të hënë, duke folur mbi një hyrje të mundshme të trupave serbe në Kosovë.
Vuçeviç ka deklaruar se nëse Forcat e Armatosura të Serbisë marrin urdhër nga presidenti Vuçiç që njësitet e tyre të hyjnë në Kosovë, ata do ta bëjnë në mënyrë efikase dhe profesionale.
Por ai shtoi se nëse një gjë e tillë ndodh atëherë do të merret leje paraprakisht nga komanda e KFOR.
“Gjatë gjithë këtyre viteve, trupat e KFOR-it nuk kanë kaluar asnjëherë në territorin e Serbisë, e as Ushtria Serbe nuk e ka bërë këtë pa lejen e KFOR-it. Ushtria serbe asnjëherë nuk ka shkelur asnjë marrëveshje dhe ky nuk është informacion teknik por thelbësor.
Nëse Forcat e Armatosura të Serbisë marrin një urdhër të tillë nga Presidenti i Serbisë si Komandant i Përgjithshëm për të hyrë në territorin e Kosovës, Forcat e Armatosura të Serbisë do ta kryejnë një detyrë të tillë në mënyrë profesionale dhe efikase, por sigurisht do të njoftohet paraprakisht KFOR-i sepse ne asgjë nuk e bëjmë pas shpine”, tha ai.
Discussion about this post