Ish-Kryeministri Sali Berisha paralajmëroi nisjen e protestave kundër Qeverisë Rama. Në një deklaratë për mediat, Berisha tha se Partia Demokratike është e vendosur për të udhëhequr shqiptarët në protesta, ndërsa e cilësoi 14 majin si një farsë elektorale.
“Ata që mendojnë se Edi Rama i vodhi zgjedhjet dhe i fitoi ato, këta nuk bëjnë asgjë tjetër veçse përligjin vjedhjen.
Ne do ngrihemi kundër këtij regjimi dhe po përgatisim një lëvizje të qëndrueshme kundër regjimit të Edi Ramës”, tha Berisha.
Ai u shpreh se po bëhet një punë e madhe për bashkimin e opozitës, ndërsa shtoi se po përgatitemi për bashkimin e të gjithë shqiptarëve kundër regjimit të Edi Ramës, për ti kthyer shqiptarëve të drejtën për të votuar të lirë.
“Përmbysja e këtij regjimi është prioriteti i opozitës dhe duhet të jetë prioritet për të gjithë shqiptarët”, tha Berisha.
Sipas tij, raporti i OSBE/ODIHR tregoi më së miri farsën elektorale të 14 majit, ku vota e shqiptarëve ishte e kontrolluar.
“Vota e kontrolluar është vota e regjimeve totalitare, defacko është në vdekje klinike. Raporti i OSBE konstaton se për kontrollin e votës u përdorën mjete antikushtetuese dhe antiligjore, të cilat dhunuan Kodin Zgjedhor, standardet ndërkombëtare të zgjedhjeve të lira.
Zgjedhjet u kontrolluan nga administrata, Patronazhisti dhe Aktivisti bënë gjithçka për të diktuar vullnetin e shqiptarëve.
Në raport gjen përqindje që përmbysin zgjedhjet. Gjen se 14 maji ishte një farsë elektorale”, tha Berisha.
Në vijim ish-Kryeministri i ka drejtuar shqiptarëve një thirrje për të mos përligjur votën e vjedhur.
“Thirrja ime për shqiptarët, për 600 mijë idealistë shqiptarë, të cilët refuzuan me përçmim çdo formë kontrolli antiligjor ndaj vullnetit të tyre, të përgatitemi në protesta të qëndrueshme të fuqishme, për të larguar këtë pushtet, që qëndron i bazuar në raportin: vota shndërrohet në krim dhe krimi në votë.
Thirrja ime për të gjithë shqiptarët është: kurrë të mos përligjni një votë të vjedhur.
Vota e vjedhur apo vota me presion, apo vota e kontrolluar, nuk shpreh vullnetin tuaj, por shpreh vullnetin e atyre që u rrëmbejnë ju të drejtën e votës.
PD qëndron fuqishëm, e vendosur të udhëheqë shqiptarët drejt një përpjekje të madhe për të votuar të lirë si qytetarët e tjerë të rajonit dhe Europës”, tha Berisha.
Discussion about this post