Shqipëria do të kthehet në një nga pikat më të mëdha në Mesdhe për rritjen dhe tregtimin e peshkut Ton, ku aktualisht ky eksport ka nisur me Japoninë. Zëvendës ministri i Bujqësisë, Roland Kristo në një intervistë për mediat, tha se për 3-4 vite pritet të investohen 35 milionë euro duke nxitur fuqizimin e këtij sektorit biznesi në vendin tonë.
Zëvendës ministri i Bujqësisë tha Shqipëria deri më sot e ka shitur peshkun Ton sapo është kapur në brigjet e Mesdheut, ndërsa sot po krijon fermën e vetë të eksportit drejt Japonisë. Kristo shpjegoi dhe mënyrën se si kapet peshku Ton dhe se si sillet i gjallë në fermën e krijuar në Shqipëri. Pas këtij procesi peshku përgatitet dhe futet në ngrirje deri në -85 gardë që kur shkon në Japoni dhe shkrin është sërish i gjallë.
“Shqipëria deri tani e ka peshkuar peshkun ton dhe ia ka shitur të gjallë fermave të tjera spanjolle apo malteze dhe nuk e kemi sjellë në Shqipëri. Sot anijet tona shkojnë deri në fund të Mesdheut dhe peshku Ton vjen deri në Shqipëri i gjallë përmes transportit me kosha. Më pas peshku përpunohet dhe futet në një anijen japoneze që ka ardhur duke kaluar në ngrirje -85 gradë që peshku kur shkrihet është përsëri i gjallë. Investimi deri tani është 5 milionë euro dhe më pas brenda 3-4 viteve pritet të shkojë 35 mln euro dhe më pas me rritje eksponenciale. Tregu i tonit të kuq shkon që në peshkim në anije diku tek 1.1 mld dollarë dhe deri te konsumatori final shkon 5 mld dollarë. Është një treg i ri biznesi që kemi futur në vendin tonë, ku përfitimet do të jenë të mëdha”, tha Kristo.
Edhe përfaqësues i Shqipërisë në IÇAT, Arian Palluqi tregoi për mënyrën e rritjes së peshkut Ton që nga monitorimi i tij me kamera në ujë e deri tek ushqyerja.
“I gjithë procesi i kultivimit të peshkut Ton filmohet nga kamera specifike që bën të mundur numërimin një për një të peshkut dhe më pas mat gjatësinë e tij. Përmes një llogaritje që bën vetë kjo teknologji përcakton edhe peshën e peshkut ton. I gjithë ky proces, por edhe procesi i kapjes së tij në det dokumentohen në mënyrë të përpiktë që nga hedhja e rrjetës nga anijet e deri tek eksportimi i tij përfundimtar”, tha Palluqi.
Industria shqiptare e peshkimit pritet të kthehet në një industri konkurruese në tregun ndërkombëtar dhe një nga pikat më të mëdha në Mesdhe për rritjen dhe tregtimin e peshkut Ton në të gjithë botën, duke u kthyer kështu në një pikë kyçe në ekonominë globale për këtë produkt.
Discussion about this post