Në 19 Gusht të këtij viti, biznesmeni 61-vjeçar gjerman, Stephan Morgenstern, kishte dalë të priste bashkëshorten e tij në aeroportin e Rinasit. Aty ai përballet me një “surprizë” aspak të këndshme. Oficerët e Policisë e shoqërojnë dhe më tej e prangosin.
Ndaj tij ishte lëshuar një urdhër-kërkimi ndërkombëtar nga Gjykata e Seulit në Korenë e Jugut. Morgenstren dyshohet se ka ngritur një skemë piramidale, me anën e të cilës ka mashtruar mbi 1 mijë investitorë koreanë, për një vlerë totale prej 28 milionë euro.
Diçitura: Sipërmarrësi gjerman, Stephan Morgenstern
Të dhënat gjyqësore, të konsultuara nga “Gijotina” tregojnë se Morgensten akuzohet nga autoritetet koreane, por ai nuk ka shkelur asnjëherë në atë vend. Ai u arrestua për efekt ekstradimi në Nëntor 2022 në Greqi, por nuk gjendej më aty. Sipërmarrësi gjerman pretendon se ka hyrë në Shqipëri në Prill 2023, por nuk ka asnjë gjurmë në pikat e kalimit kufitar.
Ai duket se ka vepruar si një “fantazmë” për t’iu shmangur pasojave ligjore për mashtrimin e supozuar të kryer në Korenë e Jugut. Dhe, parë në këndvështrimin e tij, veprimet janë të justifikuara. Në vendin aziatik, ai rrezikon dënim të rëndë, deri në burgim të përjetshëm. Tashmë, ai duhet të përballet me drejtësinë shqiptare, e cila, në dy shkallët e gjyqësorit, ka vendosur ta mbajë në burg, deri në shqyrtimin e plotë të kërkesës për ekstradimin e tij.
Historia e “skemës mashtruese”
Në nëntor të vitit të kaluar, në median greke u publikuan të dhëna të detajuara mbi aktivitetin e Morgenstren, menjëherë pas arrestimit të tij në Athinë. Sipas atyre raportimeve, sipërmarrësi gjerman qëndron pas një kompanie shitjesh on-line, “Future-net”.
Morgenstern dhe bashkëpunëtorët e tij dyshohet se kanë mashtruar në një vlerë prej 29 milionë dollarësh investitorë të ndryshëm në Poloni, Gjermani, Itali, Korenë e Jugut dhe vende të tjera, nëpërmjet një skemë marketingu në shumë nivele dhe asete. “Futurenet” u themelua në vitin 2014 nga Morgenstern dhe bashkëpunëtori i tij, Roman Ziemian.
Kompania pretendoi se po u shiste investitorëve paketa reklamimi dixhitale, të cilat ata më pas do t’ua shisnin të tjerëve për një fitim. “Futurenet” pagoi gjithashtu komisione të larta për investitorët që sollën të tjerë në kompani në atë që konsiderohet si “skemë piramidale”. Përveç paketave të reklamave dixhitale, “Futurenet” krijoi në vitin 2018 edhe platformën “Futurocoin”, e cila dështoi shumë shpejt.
Diçitura: Reklama për platformën e dështuar, “Futurecoin”
Gjithçka u shkatërrua kur autoritetet polake e shpallën kompaninë një skemë piramidale.
Autoritetet koreane ndoqën shembullin, duke akuzuar Ziemian dhe Morgenstern se kishin mashtruar rreth 1000 investitorë koreanë për miliona dollarë. Interpoli shpejt u përfshi dhe nxori një “Kartelë të kuqe” për arrestimin e të dy personave. Bazuar mbi urdhër-kërkimin ndërkombëtar, Ziemian u arrestua i pari në Itali. Ndërsa Morgenstern u arrestua në Greqi, ndërkohë që tentoi të hipte në një avion me destinacion Dubain. Ai pretendohe se kishte hapur një garazh luksoz makinash në Dubai. Pas arrestimit të tyre, gazeta koreane “Khan” raportoi se policia e atij vendi ka ngrirë asetet me vlerë 160 miliardë KRW (123 milionë dollarë) të të dyshuarve.
“Ne planifikojmë të bashkëpunojmë me Greqinë, Italinë dhe Poloninë për të marrë përsipër të dyshuarit dhe për t’i hetuar ata sipas prioritetit të çështjes. Ne planifikojmë të bëjmë përpjekje aktive në mënyrë që një pjesë e madhe e 160 miliardë KRW fitime të krimit t’u kthehet viktimave vendase”, tha një përfaqësues i policisë së Koresë së Jugut në atë kohë.
Të dhënat treguan se dy personat e dyshuar për mashtrim posedonin pasaporta diplomatike nga Gambia, duke i lejuar ata të udhëtonin pa problem në mbi 80 vende në mbarë botën, duke mundësuar më tej mashtrimin e tyre shumë milionësh.
Arrestimi në Shqipëri
Ndërkohë që autoritetet greke po shqyrtoheshin procedurat e ekstradimit të Stephan Morgenstern në gjendje të lirë, ai largohet nga Greqia. Në 19 Gusht 2023, ai arrestohet në aeroportin ndërkombëtar të Rinasit për llogari të autoriteteve koreane, ndërkohë që nuk rezultonte zyrtarisht të kishte hyrë në Shqipëri.
Morgenstern u tha oficerëve të Policisë Shqiptare se “kishte disa muaj që banonte në Shqipëri, ku kishte hyrë nga Pika kufitare Kakavijë, një ose dy ditë para zgjedhjeve lokale të 14 majit 2023. Kam hyrë si pasagjer në një autobus dhe për shkak të fluksit të madh të shtetasve që kalonin kufirin, kontrolli i pasaportë ishte vizual dhe jo i detajuar me anë të sistemit kompjuterik”. Ai deklaroi gjithashtu se është shtetas gjerman, si dhe shtetas i Republikës së Vanuotu-s.
Diçitura: Gjykata e Apelit në Tiranë la në fuqi masën “arrest me burg” për qëllim ekstradimi ndaj Morgenstern
Morgenstern nuk pranoi që të ketë patur ndonjë hetim për të apo të ketë marrë pjesë në ndonjë ngjarje kriminale në Korenë e Jugut dhe se nuk ka kryer ndonjë vepër penale. Ai gjithashtu deklaroi se, asnjë shtetas korean nuk është arrestuar për këtë çështje.
Pas arrestimit, Morgenstern u dërgua para gjyqtarit në Gjykatën e Tiranës, i cili, në 22 Gusht caktoi masën e sigurisë “arrest me burg” për efekt ekstradimi. Sipërmarrësi gjerman, nëpërmjet avokatëve të tij, e kundërshtoi vendimin, duke kërkuar lirimin e tij në Gjykatën e Apelit.
Avokatët pretenduan disa shkelje proceduriale në afatet për njoftimin e akteve që rëndonin ndaj tij. Por, pikët më të forta të mbrojtjes ishin më së paku dy. Ata, njëlloj si Morgenstern pretendon se asnjë korean nuk është arrestuar për këtë çështje, duke njoftuar gjykatën se dy persona të arrestuar fillimisht në Kore tashmë janë të lirë. Po ashtu, avokatët pretenduan se Korea e Jugut është jashtë Kartës Europiane të të Drejtave të Njeriut dhe ky faktor mund të nxisë trajtim jo-normal të klientit të tyre në Kore, aq më tepër që ai rrezikon dënimin deri në burgim të përjetshëm.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post