Nënkryetari i Lëvizjes Socialiste për Integrim, Petrit Vasili ka akuzuar Gjykatën Kushtetuese se po bashkëpunon me qeverinë pas vendimit për të njohur zgjedhjet vendore të 30 qershorit 2019 duke rrëzuar kërkesën e Shoqatës së Bashkive të Shqipërisë për shpalljen e tyre të pavlefshme.
Ndërsa e konsideron si skandal, Vasili hedh akuza të rënda se Kushtetuesja ka bllokuar pyetjen e kësaj shoqate për Komisionin e Venecias duke kompromentuar të gjithë vendimin e zbardhur prej saj dy ditë më parë.
Sipas Vasilit pasi vetë Gjykata Kushtetuese vendosi t’i drejtohej Komisionit të Venecias për opinion, u kërkoi palëve të parashtronin pyetjet e tyre, ndërsa në kërkesën përfundimtare drejtuar këtij komisioni ishin vetëm 3 pyetje që sipas tij “i bënin fresk 30 qershorit”.
”Po cila ishte Pyetja, qe i dhëmbi kaq shume Gjykatës Kushtetuese sa që ajo e bllokoi dhe në mënyrë tërësisht antiligjore dhe arbitrare, bile edhe në kundërshtim me vendimin, që mori po vete, dhe nuk e dërgoi në Komisionin e Venecias: “A është Dekreti i Presidentit për caktimin e datës së zgjedhjeve dhe ai për anulimin e saj, një akt me karakter të përgjithshëm ose akt normativ kushtetues apo është një akt administrativ nënligjor individual dhe në çdo rast, a mund të refuzohej zbatimi i tyre nga KQZ sikurse ka ndodhur, apo duhej që këto dekrete t’ju nënshtroheshin vlerësimit mbi kushtetutshmërinë vetëm nga Gjykata Kushtetuese mbi bazën e kërkimeve të subjekteve që kishin pretendime në përputhje me kriteret kushtetuese për vënien në lëvizje të kësaj gjykate”, shkruan Vasili.
Sipas tij, kjo provon se gjithçka ka qene pjesë e një strategjie të qartë mes Gjykatës Kushtetuese dhe qeverisë në shërbim të kësaj të fundit, duke e konsideruar si zhgënjim drejtësi e re.
Discussion about this post