Një tender prej 2.5 mln USD, të bërë nga Drejtori e Policisë së Tiranës, u dyshua se ishte me fitues të paracaktur. Ajo që hidhte hije dyshimi se fituesi ishte i përcaktuar para se të bëhej gara, ishin caktimi i specifikimeve për llojin e pistoletës, apo edhe të peshës së armës.
Me ndryshimin e drejtuesit të Policisë së Shtetit, ku vendin e Ardi Veliut e zuri Gledis Nano, tenderi u anullua. Dhe qëllimi i anulimit ishte e qartë, pasi tenderi ishte me fitues të paracaktuar. Gledis Nano ka firmosur anulimin, duke u bazuar në dokumentet e Veliut. Specifikimet ishin bërë në mënyrë të tillë që fitues të dilte kompania e preferuar apo ajo që kishte lobuar më fortë në qeveri për këtë procedurë.
Sipas dokumenteve, Policia e Shtetit ka njoftuar Agjencinë e Prokurimit Publik për anulimin e kësaj procedure. Procedura e tenderit ka qenë e kufizuar, në fushën e sigurisë, ndërsa është shpallur në datën 29 korrik 2021. Objekti i kontratës ishte “blerje pistoleta 9×19 mm” me një fond limit: 230,657,900 lekë ose 2.5 mln USD me TVSH. “Arsyet e anulimit është bazuar në ligjin ‘për prokurimët në fushën e mbrojtjes dhe të sigurisë’.
Kur komisioni i prokurimit publik vendos anulimin, sipas parashikimit të shkronjës “ç”, të pikës 3, të nenit 55, të këtij ligji” thuhet në këtë njoftim.
Në këtë nen thuhet: Përpara lidhjes së kontratës, Komisioni i Prokurimit Publik, kur gjykon se një vendim apo veprim i autoritetit kontraktor ka shkelur ndonjë nga dispozitat e këtij ligji, ka të drejtë: ç) tё urdhërojë anulimin e procedurave për shpalljen e kontratës fituese. Pra, procedura ka qenë tejet e finalizuar dhe gati në lidhjen e kontratës.
Në fund të njoftimit të beftë të Policisë së Shtetit, thuhet se vendimi i anulimit ka ardhur në zbatim të vendimit Nr. 866/2021, datë 09 nëntor 2021 të KPP-së. Por, çfarë ka argumentuar KPP? Në vendimin thuhet se ankues ka qenë një kompani shqiptare që donte të merte pjesë në këtë procedurë.
“Nga shqyrtimi në tërësi i specifikimeve teknike të përcaktuara nga autoriteti kontraktor në dokumentet e procedurës së prokurimit objekt ankimi, Komisioni konstaton se, ky i fundit ka përcaktuar elementë të tillë si përmasa, pesha dhe specifikime të tjera fikse për produktin objekt prokurimi. Këto elementë të përcaktuar në mënyrë fikse edhe pse mund të lidhen me funksionalitetin e produktit, përbëjnë shkak për kufizim të drejtpërdrejtë të konkurrencës” – thuhet në vendimin e KPP.
Më tej thuhet se “K.P.P. gjykon se autoriteti kontraktor nuk ka zbatuar drejt parashikimet ligjore të nenit 18 të LPFMS, pasi specifikimet teknike të përcaktuara për produktet e mësipërme, orientojnë drejt një prodhuesi të vetëm duke kufizuar konkurrencën dhe pjesëmarrjen e gjerë”. Pra, fituesi i tenderit ka qenë i paracaktuar.
Discussion about this post