Kryeministri Edi Rama dhe Presidentja e KE-së, Ursula von der Leyen, dhanë një konferencë të përbashkët për mediat, në vigjilje të Samitit të Procesit të Berlinit që nis zyrtarisht punimet nesër në Tiranë.
E ndërsa në këtë samit nuk pritet një reagim lidhur me tensionet Kosovë-Serbi, që kulmuan me sulmin terrorist të një grupi paramilitar serbësh ndaj Veriut të Kosovës, ku mbeti i vrarë edhe një efektiv i policisë, Rama sugjeroi që çdo çështje mes dy vendeve duhet të zgjidhet nën ombrellën e BE-së.
Në vijim Rama tha se Bashkimi Evropian nuk është një dyqan dhuratash, por shkolla më e sofistikuar dhe më e vështirë e shtetberjës demokratike.
“Shumë shpesh ne e lidhim BE-në dhe KE-në me financime. Janë shumë të rëndësishme dhe pa diskutim që BE është rripi i sigurisë për të gjitha vendet e komunitetit evropian, ku e keni parë në krizat si pandemia, rritja e çmimit të energjisë.
Përveç si e tillë, BE nuk është një dyqan dhuratash, por shkolla më e sofistikuar dhe më e vështirë e shtetbërjes demokratike. Në rajonin ne jemi vend me traditë të varfër institucionesh. Shqipëria ka pasur një histori që nuk e ka bërë ngritjen e një shteti në shekuj dhe BE është ndihma jonë për të pasur një shtet demokratik për të mundësuar vlerat dhe standardet evropiane.
Ne duhet që të bëjmë detyrat e shtëpisë sa më mirë në mënyrë që të marrim më shumë financime. Kjo do ndihmojë për të bërë më shumë përpjekje. Nëse BE kërkon që Procesi i Berlinit të materializohet ku rriten liritë e lëvizjes së njerëzve dhe nëse nga ana tjetër thotë që duhet të kemi më shumë akses në tregun e përbashkët, ta harrojmë nëse nuk kryejmë detyrat tona. Këto janë risi dhe vjen nga fryma gjeopolitike që ka ky komision”, u shpreh Rama.
Discussion about this post