Djali dhe vajza e liderit serb të Bosnjes, Milorad Dodik, janë futur në listën e zezë të Shteteve të Bashkuara të Amerikës, Sipas njoftimit zyrtar të Departamentit të Shtetit, Igor dhe Gorica Dodik, me rrjetin e tyre, ndihmojnë babnë që të minojë Marrëveshjen e Dejtonit të arritur në vitin 1995, si dhe të pengojë përmes korrupsionit ekonominë e Bosnje-Hercegovinës.
“Vendimi i sotëm synon që të pengojë elementet e rrjetit financiar që pasurojnë personalisht Dodikun në dëm të integritetit territorial dhe qeverisjes funksionale në Bosnje-Hercegovinë”, thuhet në njoftimin e Departamentit të Shtetit.
Më parë, edhe vetë Milorad Dodik, ishte futur në listën e zezë amerikane.
E para që ka reaguar mbi këtë vendim ka qenë vajza e Dodik, Gorica, e cila ka shpërndarë në llogarinë e saj në X postimin e ambasadës amerikane në Sarajevë, ku jepej njoftimi për futjen e saj në listën e zezë.
“Faleminderit shumë, nuk ka privilegj më të madh në këtë ditë dhe kohë se sa të jesh në listën tuaj të zezë, është prova se ne nuk jemi agresorë dhe kriminelë si ju. Duart tuaja janë me gjal deri në bërryla, kushdo që ju mbështet ju është bashkëpunëtor në krimet tuaja të tmerrshme rreth botës”, shkruan Gorica.
Discussion about this post