SPAK i kërkoi GJKKO-së vendosjen e masave të sigurisë së arrestit me burg për Jamarbër Malltezi, dhëndri i ish-Kryeministrit Sali Berisha, dhe ndërtuesit Fatmir Bektashi, në kuadër të një hetimi dy vjeçar mbi atë që njihet si dosja e kompleksit Partizani.
Po kështu SPAK ka kërkuar masën e sigurisë “detyrim paraqitje” ndaj ish-Kryeministrit Sali Berisha, por edhe ndalimin e udhëtimeve të tij jashtë vendit. Dhe bazuar në vendimin e GJKKO-së, ish-Kryeministrit duhet ti sekuestrohet pasaporta deri në përfundim të hetimeve.
Vendimi i GJKKO-së është zbatuar me arrestimin e Malltezit, i cili u ndalua në aeroportin “Nënë Tereza” ku ndodhej për të pritur bashkëshorten e tij nga një udhëtim jashtë vendit. Gjithashtu vendimi u zbatua me arrestimin e ndërtuesit Bektashi, ndërsa në rastin e ish-Kryeministrit, dy oficerë të Policisë së Shtetit, më konkretisht të krimit ekonomik dhe pastrimit të produkteve të veprës penale, u shfaqën në mbrëmje në selinë e PD-së duke kërkuar një takim me Berishën për ti komunikuar vendimin e GJKKO.
Prokurorët që hetuan dosjen janë Enkeleda Millonai dhe Arben Kraja, ish-drejtues i SPAK. Ndërkohë vendimi i GJKKO është firmosur nga Irena Gjoka, e cila mban detyrën e kryetares së Gjykatës së Posaçme, të paktën edhe për 6 muaj, deri në përfundimin e mandatit si drejtuese.
Mësohet se Gjoka ka vlerësuar kërkesën e SPAK duke vendosur arrestimin e Malltezit e Bektashit dhe caktimin të një mase më të butë sigurie ndaj ish-Kryeministrit.
Berisha në një konferencë për mediat përmendi Kushtetutën, duke akuzuar SPAK dhe GJKKO se kanë shpërfillur lejen e Kuvendit për ti ndaluar një deputeti daljen jashtë vendit. Berisha atakoi prokurorët e SPAK, duke kujtuar se ata kanë fshehur dosje dhe janë vënë në shërbim të Edi Ramës, të cilin e akuzoi si personin që qëndron pas arrestimit të dhëndrit të tij.
Gjoka ka kaluar procesin e Vetting, edhe pse Komisioneri Publik ka kërkuar largimin e saj nga sistemi i drejtësisë për shkak të problemeve me pasurinë, pretendime këto që u rrëzuan nga KPA.
Discussion about this post