Dy doganierë që u përfshinë në një konflikt fizik mes tyre janë pezulluar nga detyra. Lajmi u bë i ditur nga Dogana e Kosovës, sipas të cilës të dyshuarit janë përfshirë në një konflikt që mund të jetë i përshkallëzuar.
“Kjo çështje do t’i nënshtrohet një procesi hetimor rigoroz dhe transparent për të hedhur dritë mbi të gjitha rrethanat e konfliktit të supozuar. Ne jemi të përkushtuar për të zbuluar të vërtetën dhe për të siguruar që masat e duhura janë ndërmarrë si rezultat i gjetjeve.
Dogana e Kosovës do të punojë me përkushtim për të siguruar që drejtësia të vihet në vend dhe të ndërmerren veprimet e nevojshme korrigjuese, në përputhje me përkushtimin tonë për ruajtjen e standardeve më të larta të sjelljes brenda organizatës sonë”, ka thënë Dogana në njoftimin e saj.
Burime të Indeksonline pohojnë se zyrtari Ardian Nixha ka sulmuar fizikisht kolegun e tij të punës, Enis Thaqin. Të dyshuarit janë rrahur me njëri tjetrin në pikëkalimin kufitar në Vermicë.
Konflikti dyshohet të ketë nisur në pikën e kontrollit të hyrje-daljeve në kufi.
Discussion about this post