GJKKO i ka caktuar një avokat kryesisht ish-Kryeministrit Sali Berisha, për ta mbrojtur në atë që njihet si seanca e ri-vlerësimit të masave të sigurisë ndaj tij, në kuadrin e hetimit të SPAK mbi privatizimin e kompleksit Partizani.
Mbrojtësit e Sali Berishës, avokatet Genc Gjokutaj dhe Sokol Mëngjesi u larguan nga seanca e GJKKO-së, pasi janë rrëzuar kërkesat e tyre për të kaluar çështjen në Kushtetuese, për interpretim, ndërkohë që kishin kërkuar edhe largimin e gjyqtares Irena Gjoka.
GJKKO njoftoi se kishte caktuar Artan Simonin si avokat kryesisht.
Por avokati Simoni, në një postim të tij në rrjetet sociale, të para dy ditëve, duket se ka thumbuar ish-Kryeministrit Berisha, pavarësisht se nuk ia përmend emrin.
Me një mesazh “misterioz”, Simoni shkruan në rrjetet sociale: “Bisha është plakur, bisha është lodhur, bisha s’mundet më. Shumë prej atyre që dikur bisha mbante mbi kurriz, pas kurrizit kanë filluar t’a çukasin. Ku gaboi bisha?!”.
Nuk dihet nëse avokati i caktuar kryesisht nga GJKKO do të mbrojë ish-Kryeministrin, ose së paku ai duhet të shpjegojë nëse postimin misterioz e ka pikërisht për klientin që ia ka caktuar gjyqtarja e GJKKO, të cilën Berisha e ka kallëzuar në SPAK për “shpërdorim detyre”.
Discussion about this post