Izraeli godet 150 objektiva të Hamasit, vritet lideri i Hamasit

në Botë, Lajme

Kohë leximi: 2 min

Lufta në Lindjen e Mesme vazhdon. Izraeli e përshpejtoi operacionin në Gaza dhe nisi një inkursion në Rrip të premten në mbrëmje, fillimisht me bombardime të forta, pastaj me inkursione tokësore.

Megjithatë, ky nuk është ende pushtimi i madh tokësor i shpallur ditë më parë, siç specifikohet nga zëdhënësi i Forcave të Mbrojtjes izraelite Peter Lerner.

Rreth 150 objektiva nëntokësore, duke përfshirë edhe tunele, u goditën nga forcat ajrore izraelite mbrëmë në veri të Rripit. Zëdhënësi ushtarak njoftoi se disa terroristë janë vrarë.

“Aeroplanët luftarakë të udhëhequr nga informacionet e sakta të inteligjencës mbrëmë vranë kreun e forcave ajrore të organizatës terroriste Hamas, Ezzam Abu Raffa. Ai ishte përgjegjës për menaxhimin e pajisjeve UAV, dronëve, zbulimit të ajrit, paragliderëve dhe forcave ajrore të mbrojtjes të organizatës Hamas”, shkruajnë në X, forcat Ajrore Izraelite.

Mbrëmja ishte “nata më e keqe” që nga fillimi i luftës për shkak të intensitetit të bombardimeve.

Këtë e raportuan disa banorë të Rripit të Gazës për Haaretz, sipas të cilëve ka pasur sulme të pandërprera nga forcat e armatosura izraelite në pjesën lindore të qytetit, nga kampi i refugjatëve Jabaliya deri në Bet Lahiya dhe Bet Hanun. Sulme u raportuan gjithashtu në Rripin qendror dhe në Khan Yunis në jug.