VIDEO/ Tensione në Kuvend, përplasje mes deputetëve. Ja ç’po ndodh

Deputetë të opozitës dhe mazhorancës po përplasen në mbledhjen e Komisionit të Etikës, atje ku pritet të merret vendimi për përjashtimin e 7 deputetëve të PD-së nga punimet e Parlamentit.

Ashtu si edhe në seancën e djeshme parlamentare, mazhoranca e PS ka përdorur gardistët si një mburojë, ndërsa opozita kërkoi largimin e gardistëve.

Deputetja Albana Vokshi ka kërkuar që mbledhja të mbahet e hapur, duke akuzuar PS se po bën gjyqe politike.

“Doni normalitet në Kuvend, plotësoni të drejtat e opozitës, pranoni Komisionet hetimore dhe përfaqësuesin e opozitës në Komisionin për Reformën Zgjedhore”, iu drejtua Edmond Spaho, Eduart Shalsit të PS-së.

Ish-Kryeministri Sali Berisha tha se në Kuvend s’do ketë më paqe deri sa të kthehen të drejtat e opozitës. Berisha tha se ky Parlament nuk meriton të ekzistojë as edhe 1 javë, pasi nuk përfaqëson interesat e qytetarëve. “Çdo deputet i partisë së krimit ka 3 truproja, kjo është një gjë e pashembullt”, tha Berisha. Sipas tij, Edi Rama ka vendosur të dëmtojë lëvizjen opozitare duke përjashtuar deputetët e PD-së.

“Ose do të vendosim parlamentarizmin, ose Parlament banditësh nuk do të ketë”, tha Berisha.

Të gjitha debatet dhe përplasjet kanë ndodhur fillimisht në një nga zyrat e Kryesisë së Kuvendit, dhe më pas është zhvendosur në korridoret e godinës.

“Do ju numëroj të gjitha shkaqet pse ata janë të vendosur të protestojnë in ekstremis. Ky parlament bandisesk nuk meriton të ekzistojë, ky parlament përfaqëson jo interesat e qytetarëve por të kësaj pseudomazhorance që kërkon të asgjësojë të drejtat e opozitës. Ne kemi vendosur që këtë protestë ta bëjmë në këtë ndërtesë në emrin tuaj në mënyrë që ju të keni përfaqësuesit tuaj në parlament.

Deputetët e PD erdhën këtu që të angazhohen në një debat të hapur për të kuptuar shkaqet e përjashtimit të tyre. Ne do të protestojmë në çdo skaj dhe ose do vendosim parlamentarizmin ose parlament banditët nuk do kenë”, tha Berisha, në një lidhje live në Facebook e tij.

Partia Socialiste ka kërkuar që 7 deputetë të Partisë Demokratike të përjashtohen nga punimet e Kuvendit, për shkak të bllokimit që i bënë punimeve të parlamentit të hënën.

Emrat e deputetëve që kërkohen të përjashtohen janë: Gazment Bardhi, Bledion Nallbati, Lefter Gështenja, Flamur Noka, Saimir Korreshi dhe Albana Vokshi.