Në 2017-ën, kohë kur PD e drejtuar nga Lulzim Basha ngriti në bulevard atë që e quante si “çadra e lirisë” nisi të artikulohej edhe një slogan mbi “republikën e re”.
Në atë kohë, Basha në çdo fjalim që mbante dhe në çdo takim që bënte, fliste për “republikën e re” që do të instalonte.
Madje edhe pas takimit disa orësh me Edi Ramën më 17 maj, Basha sërisht shpresonte te “Republika e Re”.
Fliste për ndryshime të Kushtetutës, për Parlamentin me 100 vende, për Presidentin e zgjedhur nga populli etj etj. Për të njëjta ndryshime kushtetuese flet edhe sot, por ka fshirë nga fjalori sloganin e “republikës së re”.
Por sot këtë slogan e ka “ngjallur” deputeti socialist Petro Koçi. Madje, socialisti që dikur drejtonte katharsisin në rradhët e socialistëve sot shprehet i bindur se “republika e re” do të fitojë dhe manovrat dhe dhuna e të korruptuarve, sikundër ai cilëson Sali Berishën dhe deputetë të opozitës, nuk mund ta rrëzojnë.
“Drejtësia e re, e ngritur mbi gërmadhat e drejtësisë së vjetër, e cila varej nga qikllopet e politikës së korruptuar, ka mbështetjen e popullit pa dallim feje, krahine dhe ideje.
Kjo drejtesi e re mund të themi se po hedh themelet e një Republike të Re”, shkruan Petro Koçi në një postim në rrjet.
E ndër të tjera, ai e konsideron lëvizjen e opozitës brenda parlamentit, si haxhiqamiliste.
“Sulmojnë institucionet duke ëndërruar një grusht shteti kundër SPAK ut. Duke tentuar të zëvendësojnë ballafaqimin politik civil me konfrontim fizik dhe konkurrimin e alternativave me përleshje boksi ata në fakt nuk po sulmojne maxhorancen por vetë shtetin, vetë Republikën”, shkruan Koçi ndër të tjera.
Reagimi i deputetit socialist Petro Koçi ndaj asaj që konsiderohet si lëvizja e opozitës brenda Parlamentit pothuajse është në të njëjtën gjatësi vale me atë të mbajtur nga grupimi i Lulzim Bashës, i cili ka shfaqur një gjuhë më të moderuar ndaj kolegëve opozitarë, edhe pse i akuzon se me veprimet e tyre janë vënë në shërbim të Edi Ramës.
Discussion about this post