Opozita do të përshkallëzojë qëndrimin e saj, duke shkuar drejt një greve urie, nëse mazhoranca nuk reflekton ndaj kërkesave të saj në Kuvendin e Shqipërisë, për ngritjen e Komisioneve Hetimore dhe përsa i takon zëvendësimit të anëtarëve të saj në komisionin për reformën zgjedhore.
Kjo u bë e ditur nga deputeti Xhelal Mziu në studion e A2CNN.
“Ne nuk jemi futur dhe po bëjmë zhurmuesin, struktura e grupit të deputetëve të opozitës, kemi informuar ambasadat, kemi dhënë bazat ligjore, po informojmë dhe strukturat ndërkombëtare që janë të interesuar për funksionimin normal të Parlamentit.
Ne i kemi të përcaktuara kërkesat; bëni miratimin e këtyre komisioneve. Nëse nuk ngrihen komisionet mund të shkojmë edhe në grevë urie, derisa sa kryeministri e mazhoranca të mësojnë që duhet respektohet kushtetuta dhe rregullorja e parlamentit”, tha Mziu.
Për kaosin e krijuar një ditë më parë në parlament, Mziu deklaroi se dy prej gardistëve ishin të armatosur.
“Kemi tentuar të bllokojmë funksionimin e parlamentit pas mohimit të komisioneve hetimore. Dita e djeshme na imponoi veprime të tilla, sjellja e gardës na imponoi. Dy prej gardistëve ishin të armatosur”, tha ai.
Për përplasjen fizike mes tij dhe deputetit socialist Xhemal Qefaliaj, deputeti demokrat tha se asnjë nga koleget e mi nuk dëshiron të përplaset, nuk ndjehemi komodë, por jemi të imponuar për të gjetur një mënyrë reagimi.
“Ne të vetmen gjë që mund të përdorim është bllokimi i vazhdimit të seancës. Shumica e kolegëve të majtë e mirëkuptojnë, por ndonjë i imponon për përplasje. Rasti i djeshëm ishte një veprim që u habita, i cili u përplas me Likajn, Dogjanin tek unë dhe Spaho. Mu duk e çuditshme”, tha ai.
Discussion about this post