Berisha: Rama përdori vrasësit dhe kriminelët që liroi SPAK

Gjatë një takimi me të rinjtë e FRPD-së, kreu demokrat Sali Berisha tha se shqiptarët po largohen nga vendi sepse nuk votojnë dot, ndërsa SPAK liron kriminelët që vjedhin votat.

“Nga viti 2013 gjer më sot, në 10 vite, nga Shqipëria sipas statistikave të Eurostat, u larguan në vendet e BE, 1.1 milionë shqiptarë, 80 përqind e tyre të rinj.

80 përqind e tyre nën moshën 40 vjeç.

Të supozojmë për një moment se ky vend ishte i pushtuar nga një pushtues i huaj. Dhe të mendojmë se gjatë këtij pushtimi, u larguan nga Shqipëria, 34 përqind e popullatës.

A meritonte ky pushtues mallkim dhe urrejtje më të madhe për këtë që u bëri shqiptarëve?

Këtë nuk ua bëri një pushtues shqiptarëve, këtë ua bëri një njeri”, tha Berisha.

Sipas ish-Kryeministrit, Rama iu vrau shpresën shqiptarëve, pasi nuk i la të votojnë të lirë.

“Në çdo vend, qeveria ka plus-minuset e saj, por në 4 vjet, qytetarët marrin vendimin e tyre. Kurse këtu, ajo bandë që patë, ka dhjetëra vrasje të regjistruara. Ndonjëri që ishte aty, ka vrarë të fejuarën 15-vjeçare në gjumë.

Dhe kjo nuk ka ndodhur para 30 vitesh apo 20 vitesh, kjo ka ndodhur para pak vitesh. Ai vrasës ishte këtu. Një prokuror e arrestoi atë, e solli në Tiranë. E kishte SKAP-i i partisë.

Dhe SKAP-i i partisë pasi mori 1 milion, 2 milionë para droge prej tij, nuk janë organizatë ata, do shkojnë në Shkodër. Në Shkodër ai u lirua, ndaj dhe bënte ligjin në qendrat e votimit.

Autokolona e asaj bande, me 6 vetura të blinduara, e shoqëruar nga policia, bënte në darkë mbledhje me ministren.

Ja pse ikin shqiptarët, sepse pushtetin nuk e ndërrojnë dot me votë, sepse vota e tyre diktohet nga krimi dhe vota e tyre shndërrohet në krim.
Erdhi në pushtet përfaqësuesi i tyre, çfarë bëjnë tani? Janë vërsulur me tërbimin më të madh mbi Shkodër, të shpërblehen me pallate, të shpërblehen me resorte”, tha Berisha.

Ish-Kryeministri deklaroi se e njëjta situatë është në Durrës, ku vrasësit i kanë sjellë nga Dubai.

“E tillë ka qenë situata në Durrës. i kanë sjellë nga Dubai vrasësit. E tillë në Elbasan, e tillë në Korçë.

Në diktaturën komuniste, terrorin e ushtronte policia sekrete, në narkodiktaturë ose mobokraci, terrorin e ushtrojnë ata që kanë bërë me dhjetëra vrasje, që bëjnë mbledhje me ministra në darkë dhe dalin pastaj ushtrojnë atë terror mbi qytetarët”, tha Berisha.