Kryeministri Edi Rama nënshkroi dje në Romë një marrëveshje me kryeministren italiane, Giorgia Meloni, përmes të cilës emigrantët e paligjshëm që kapeshin në brigjet italiane do të zbarkonin në portin e Shëngjinit, ndërsa do të akomodoheshin në Shqipëri në pritje të shqyrtimit të kërkesave të tyre.
Marrëveshja e nënshkruar ka shkaktuar reagime në Romë dhe Tiranë, nga opozitat respektive, ndërsa shumë detaje të saj vijojnë të mos publikohen.
Ndërkohë pritet që të enjten pasdite në Tiranë të organizohet një protestë kundër strehimit të dhjetëra mijëra emigrantëve ilegalë mes Shqipërisë dhe Italisë.
Në posterin e protestës organizatorët paralajmërojnë se ky tubim mbahet kundër “kthimit të Shqipërisë në depo të vendeve të mëdha evropiane”.
Një fakt interesant është se në 6 nëntor të 10 viteve më parë, Rama nënshkruante marrëveshjen për depozitimin në Shqipëri të armëve kimike, vendim ky që u pasua nga protesta të mëdha, që detyruan Qeverinë të tërhiqej.
Tashmë, Rama po synon ta kthejë Shqipërinë jo më në një depo armësh kimike, për në një vendstrehim të emigrantëve afrikanë. Nuk dihet se çfarë përmasash mund të ketë protesta e paralajmëruar dhe sa mund të zgjasë ajo, por duket se organizimi po bëhet nga qytetarët përmes rrjeteve sociale.
Discussion about this post