Kryeministri Edi Rama nënshkroi një marrëveshje me homologen italiane, Giorgia Meloni, për ngritjen e kampeve të refugjatëve në territorin shqiptar, të cilat do të shërbejnë si qendra pritjeje për afrikanët që do të kapen në brigjet italiane. Marrëveshja parashikon që njëherazi në territorin shqiptar të mos akomodohen më shumë se 3 mijë refugjatë, ndërsa ata do të qëndrojnë në qendrat e pritjes jo më gjatë se koha që kërkojnë procedurat e azilit, sipas rregullave dhe ligjeve italiane.
E ndërsa Rama ka mbajtur sekret deri në momentin e fundit marrëveshjen, e cila duket se është arritur gjatë vizitës private të Melonit në jug të Shqipërisë, kur u tha se do të pushonte disa ditë, sot Qeveria ka publikuar të plotë atë.
Në anën tjetër duket se Kryeministri shqiptar ka anashkaluar totalisht edhe UNHCR, Agjencia e Kombeve të Bashkuara për Refugjatët.
UNHCR nuk është palë apo e përfshirë në marrëveshjen Itali-Shqipëri. UNHCR-ja nuk ishte informuar apo konsultuar për përmbajtjen e marrëveshjes apo detajet e saj. “Aktualisht po kërkojmë informacione të mëtejshme nga autoritetet përkatëse”, thuhet në reagimin e Agjensisë
Në vijim, UNCHR thekson se kthimet ose transferimet në vende të treta të sigurta mund të konsiderohen të përshtatshme vetëm nëse përmbushen disa standarde – në veçanti, që ato vende të respektojnë plotësisht të drejtat që rrjedhin nga Konventa e Refugjatëve dhe detyrimet e të drejtave të njeriut, dhe nëse marrëveshja ndihmon në ndarjen e përgjegjësisë për refugjatët në mënyrë të barabartë midis kombeve, në vend që ta zhvendosin atë.
“Sipas ligjit ndërkombëtar për refugjatët, përgjegjësia kryesore për vlerësimin e kërkesave për azil dhe dhënien e mbrojtjes ndërkombëtare i takon shtetit në të cilin një azilkërkues arrin, qoftë në kufijtë tokësorë apo në det, dhe e kërkon atë mbrojtje. Ky detyrim mbetet i pandryshuar nga transferimi i azilkërkuesve apo përpunimi jashtëterritorial. Ndërsa marrëveshjet e transferimit ligjor për bashkëpunimin për azilin mund të bëhen ndërmjet shteteve, masa të tilla duhet të sigurojnë dhe përmirësojnë mbrojtjen e refugjatëve.
UNHCR vazhdimisht ka bërë thirrje për veprim për të trajtuar situatën e dëshpëruar në Mesdhe dhe për të garantuar solidaritet, veçanërisht me shtetet më të prekura. UNHCR njeh sfidat e paraqitura nga rritja e lëvizjeve të përziera dhe është e gatshme të punojë me shtetet për masa të ligjshme për t’iu përgjigjur në mënyrë më efektive ardhjeve, bazuar në ndarjen e përgjegjësive dhe në përputhje me standardet ndërkombëtare, në frymën e bashkëpunimit ndërkombëtar, me masa mbrojtëse dhe garanci adekuate. për të garantuar respektimin e të drejtave.
UNHCR po kërkon të diskutojë më tej detajet me qeverinë italiane dhe atë shqiptare për të kuptuar më mirë implikimet për refugjatët dhe njerëzit e tjerë që kanë nevojë për mbrojtje ndërkombëtare”, thuhet në reagimin e UNCHR, një ditë pasi Rama dhe Meloni bënë fakt të kryer marrëveshjen mes dy qeverive.
Discussion about this post