Ballkani i merr barazimin Astanës, Daja i kënaqur…

Ballkani ka marrë një barazim (0:0) në transfertë ndaj Astanës, në takimin e xhiros së katërt të Conference League.

Media sportive kazake “Sport” është e befasuar me lojën e mirë të kampionëve të Kosovës.

“Me një rezultat të papritur ka përfunduar ndeshja e Astanës në Conference League.

Në ndeshjen e fazës së grupeve, Astana luajti në shtëpi me Ballkanin.

Skuadra vendase u konsiderua si favorit, por mysafirët kishin fillim më të mirë, por deri në mesin e pjesës së parë praktikisht nuk pati momente të rrezikshme, më pas ekipet u përmirësuan dhe u shfaqën kërkuese, por asnjëra nuk arriti që të hapte rezultatin.

Në pjesën e dytë kosovarët ishin shumë më aktivë, e mbajtën topin për një kohë të gjatë dhe krijuan rrezik pranë portës së portieri Josip Çondriçit, i cili e mbajti rezultatin 0:0.

Më 30 nëntor, Astana do të presë në shtëpi Dinamon e Zagrebit”, shkruan media kazake.

Trajneri i Ballkanit, Ilir Daja, është shprehur i kënaqur me barazimin, por ka pranuar se ekipi i tij meritoi me shumë se një pikë në duelin e luajtur në Kazakistan.

“Besoj se meritonim më shumë sepse kemi kontrolluar më shumë topin, në përqindjen më të madhe e kemi diktuar lojën. Kemi pasur shanset tona që po të kishim shënuar do ta kishim fituar lojën.

Kemi bërë një lojë shumë të mirë, sepse ndryshimi i orarit gati 5 orë me Kosovën është e ndjeshme por nuk e hetuam këtë”, tha Daja.

Ai shtoi se gjithçka shkoi sipas planit, pasi Ballkani në këtë përballje luajti me dy qendërsulmues.

“Ndeshja shkoj sipas planit. Në mbrojtje kemi luajtur shumë mirë sepse e kemi studiuar mirë kundërshtarin, por në 20 metrat e fundit mund të kishim bërë zgjidhje më të mira.

Kemi barazuar rekordin tonë të pikëve nga edicioni i kaluar. Jemi mirë dhe duhet të vazhdojmë në këtë rrugë sepse do t’i luajmë deri në fund shanset tona për të kaluar grupin”, tha Daja për ArtMotion.

“Ne nuk kemi pasur objektiv kalimin e grupit, por kjo pritshmëri është rritur pas fitores me Dinamon.

Ne do të vazhdojmë të japim kontributin për ta prezantuar më së miri futbollin e kampionatit të Kosovës dhe pastaj do t’i numërojmë pikët në fund të fazës së grupit”.