Empoli ka mposhtur me përmbysje Udinesen në javën e 16-të të Serie A. Ishte Nedim Bajrami ai që i dha dorën më të madhe Empolit në këtë fitore pasi shënoi një gol personalisht, si dhe ishte njeriu asist në golin e tretë.
I pari në avantazh kaloi ekipi i Udineses në pjesën e parë më anë të Gerard Deulofeu. Sulmuesi spanjoll kombinoi mjaft mirë me Success dhe i vetëm përballë portierit e çoi topin në 1-0.
Megjithatë, pjesa e dytë foli vetëm për Empolin që u hodh në fushën e lojës me një tjetër fytyrë. Ishte Stojanovic që baraspeshoi gjithçka në fillimin e pjesës së dytë pas një goli mjaft të bukur në kufijtë e zonës.
Më pas erdhi edhe “Bajrami show”. Shqiptari u gjend në mesin e zonës me portën bosh duke përmbysur gjithçka në 2-1. Ndërkohë, pak minuta më vonë, ishte përsëri Bajrami që hodhi bazat e golit të tretë. Ai pa të lirë në zonë Pinamontin që shfrytëzoi mjaft mirë pasimin e shqiptarit duke e çuar topin në rrjetë.
Kështu, Empoli del nga ky takim me tre pikët dhe qëndron në vendin e 11 me 23 pikë, po aq sa Verona e vendit të dhjetë. Udinese ndërkohë ka 16 pikë dhe qëndron në vendin e 14-të.
Discussion about this post