Një shofer kamioni është dënuar me 3 vjet burg nga gjykatat në Mbretërinë e Bashkuar, pasi pranoi se ishte pjesë e një rrjeti që kontrabandonte emigrantë.
Muhamed Alievski, 28-vjeçari nga Maqedonia e Veriut, u shpall fajtor nga gjykata e Canterbury dhe u dënua me 3 vite heqje lirie.
Në kamionin që drejtohej prej tij oficerët e Agjencisë Kombëtare të Krimit (NCA) në Ashford të Kentit, gjatë një operacioni që u zhvillua në muajin gusht, gjetën të fshehur një 22 vjeçar shqiptar. Ky i fundit, i dënuar për drogë, kishte thyer një urdhër gjykate, ndërsa maqedonasi po tentonte ta nxirrte jashtë vendit.
Si shqiptari ashtu edhe maqedonasi u arrestuan, ndërsa 28-vjeçari, shofer kamioni u përball edhe me akuzën që lidhej me përfshirjen në aktivitete e trafikimit. Ai pranoi akuzën.
“Ky njeri ishte i gatshëm të trafikonte një kriminel në kërkim jashtë vendit për para. Kamionistët e korruptuar si ai ofrojnë një shërbim thelbësor për grupet e organizuara kriminale të përfshirë në trafikun e qenieve njerëzore dhe NCA është e vendosur për të ndërprerë dhe shkatërruar këto rrjete”, tha një prej zyrtarëve të NCA që hetoi rastin.
Discussion about this post