Lajmi i fundit/ Kryebashkiaku i Kuçovës shkon në SPAK

Kryebashkiaku i Kuçovës, Kreshnik Hajdari është paraqitur ditën e sotme pranë Prokurorisë së Posaçme SPAK.

Siç shihet nga pamjet, ai shoqërohej nga avokati i tij, Theodhori Sollaku.

Ditën e djeshme, me vendim të Kryekomisionerit të Zgjedhjeve, Ilirjan Celibashi, Kreshnik Hajdarit nuk iu hoq mandati i kryebashkiakut.

Mandati i Kreshnik Hajdarit u vu në diskutim pasi koalicioni “Bashkë Fitojmë” vërtetoi pretendimin se kryebashkiaku i Kuçovës gënjeu në formularin e dekriminalizimit.

Dokumenti i sjellë nga drejtësia greke konfirmoi se Kreshnik Hajdari rezulton i dënuar me vendim të formës së prerë për veprën kalim i paligjshëm i kufirit në fundin e viteve ‘90, por ai nuk e kishte deklaruar me argumentin se nuk ishte në dijeni të vendimit të gjykatës së Janinës.

Për Ilirjan Celibashin edhe sikur kryebashkiaku i Kuçovës ta kishte deklaruar, atij nuk do t’i ndërpritej mandati pasi vepra e kryer nuk është subjekt i ligji të dekriminalizimit.