Vdekja e futbollistit Raphael Dwamena shokoi të gjithë opinionin në Shqipëri, por sigurisht më e tronditur ishte familja e tij.
Motra e tij është shfaqur në një televizion ganez së fundmi, ku ka dhënë një intervistë në lidhje me vëllain e saj të ndjerë.
Ajo tregon se kishte folur vetëm dy ditë para ndeshjes me 28-vjeçarin, i cili ndërroi jetë pasi pësoi një sulm në zemër, teksa po luhej takimi Egnatia-Partizani.
Nga ana tjetër, ajo tregon se e kishte mësuar nga rrjetet sociale humbjen e vëllait pas njoftimit të nënës, se nga Shqipëria flitej për lajme të këqija rreth jetës së të birit.
Megjithatë, ajo duket se nuk po e përballon mirë këtë situatë dhe nga tronditja ka humbur ndjenjat në transmetim live. Ajo është dërguar me urgjencë drejt spitalit, ku ka marrë dhe ndihmën e nevojshme mjekësore.
Futbollisti prej kohësh vuante nga problemet e zemrës dhe ishte këshilluar nga mjekët që të mos luante më futboll.
Por ai kishte refuzuar të tërhiqej nga ëndrra e tij dhe kishte vendosur një defibrilator për të kontrolluar rrahjet. Megjithatë, ai kishte pak kohë që e kishte hequr këtë pajisje dhe dyshohet se kjo ka rezultuar fatale.
Discussion about this post