Të tjera detaje janë zbardhur nga ngjarja e ndodhur mesditën e sotme në Peqin, ku në prani të kryebashkiakut Bukurosh Maçi, pati një shkëmbim zjarri mes dy personave.
Leonard Elezi 50 vjeç dhe Adriatik Ceka 40 vjeç fillimisht kanë pasur një përplasje verbale, më pas sherri ka degjeneruar deri në përdorimin e armëve.
E gjithë ngjarja ka ndodhur në prani të kryebashkiakut, ndërsa Policia ka gjetur në vendin e ngjarjes rreth 20 gëzhoja që i përkasin dy armëve të ndryshme. Kjo do të thotë se mes dy personave të shpallur në kërkim ka pasur një shkëmbim zjarri, dhe dyshohet se shkrehja e armëve nuk ka qenë në ajër, sikundër raportoi Policia, por drejt.
Fatmirësisht nga të shtënat nuk ka pasur persona të lënduar, ndërkohë që hetimet vazhdojnë.
Ende nuk dihet shkaku i konfliktit mes Elezit dhe Cekës, ndërsa policia po administron dëshmitë e mbledhura nga individë që kanë qenë prezent në vendin e ngjarjes.
Njoftimi i policisë për ngjarjen:
Peqin/Informacion paraprak
Rreth orës 13:30, në lagjen “Xhami”, dyshohet se gjatë një konflikti për motive të dobëta, ndërmjet shtetasve L. E., 50 vjeç dhe A. C., 40 vjeç, dyshohet se ky i fundit ka qëlluar me armë zjarri, në ajër. Nga të shtënat nuk ka shtetas të dëmtuar.
Menjëherë pas njoftimit, shërbimet e Policisë kanë shkuar në vendngjarje dhe vijojnë krehjen e zonës, me qëllim kapjen e shtetasve L. E. dhe A. C.
Ndërkaq, grupi hetimor po punon për sqarimin e rrethanave të rastit.
Discussion about this post