Drejtori i Përgjithshëm i Policisë së Shtetit, Muhamet Rrumbullaku, ka urdhëruar hapjen e konkursit për gradat madhore në Polici, një proces i bllokuar prej kohësh. Aplikimet do të përfundojnë më 17 dhjetor, ndërsa në total janë 572 funksione nga grada Drejtues e Drejtues i Parë te Kryekomisar e Komisar.
Pas seleksionimit, kandidatët të cilët plotësojnë kriteret, do t’i nënshtrohen vlerësimit me shkrim dhe gojë, ndërsa në vendimin final përllogaritet dhe performanca në detyrë e aspekti administrativ. Për gradat në Policinë e Shtetit u fol për herë të fundit gjatë kohës kur kjo strukturë drejtohej nga Gledis Nano, i cili u largua pa mbushur 1 vit në funksionin e Drejtorit të Përgjithshëm të Policisë. Pas largimit të Nanos, në krye të Policisë u emëruar Muhamet Rrumbullaku që pezulloi procesin e nisur nga paraardhësi i tij, pa dhënë ndonjë shpjegim.
Numri i funksioneve të lira për konkurrim sipas gradave policore:
Drejtues i parë – 12 funksione
Drejtues – 40 funksione
Kryekomisar – 200 funksione
Komisar – 320 funksione
Procesi i konkursit për gradat në strukturën e Policisë së Shtetit vjen në një kohë kur në radhët e uniformave blu ka nisur e ashtuquajtura “ fushatë e vetëpastrimit” ndërsa efektivë me detyra të rëndësishme kanë dalë të përfshirë në veprimtari të paligjshme pas zbërthimit të aplikacionit SKY ECC nga autoritetet franceze.
Tashmë procesi i gradave mund të pasohet me një furtunë ndryshimesh në Policinë e Shtetit, veçanërisht në kupolën drejtuese të saj, si dhe në drejtoritë e qarqeve. Deri më tani ka pasur një stanjacion përsa i takon reformimit të strukturës së policisë, ku hera herës ndryshimet kanë qenë thjesht lëvizje paralele, ose promovime nepotike apo klanore, që më së shumti kanë çuar në uljen e besimit të uniformave të Policisë në raport me publikun.
Discussion about this post