Ballist Morina ishte një ditë më parë i ftuar në emisionin “Ftesë në 5”, në Top Channel, ku foli për një nga djemtë e Kombëtares.
Në ndeshjen me Çekinë në Arenën Kombëtare, Jasir Asani, autor i një nga tre golave të asaj nate, ka ndërruar bluzat me “supertifozin” kuqezi.
Gjatë bisedës me Bieta Sulon, Morina u shpreh se me Asanin ka qenë dashuri me shikim të parë dhe se tek ai shikon veten kur luan në fushë, si një nga ëndrrat e tij të parealizuara, për të luajtur me Kombëtaren.
“Me Asanin kemi shkëmbyer bluzat. Asani është një djalë fantastik, ashtu si djemtë e Kombëtares. Me Asanin ka qenë ajo dashuria me shikim të parë. Për herë të parë e kam takuar në Çeki.
Nga aspekti i futbollit shoh atë që më ka munguar. Kam pasur dëshirë në moshë të re të luaj për Kombëtaren. Është diçka e bukur që ai është aty. Atë që nuk kam mundur të realizoj vetë e shikoj tek ai. Atë pasionin që e ka, më duket se jam aty”, u shpreh Ballisti.
Ndërkohë me fanellën e Asanit, Morina tregon se ku e dërgoi:
“Fillimisht jemi dakordësuar dhe kam menduar që ta dërgojmë në Kazermën në Veri të Kosovës. Me kalimin e kohës, ka qenë vëllai i madh i imi që më ka sugjeruar familjen Bunjaku. Kam marrë vëllain dhe një dashamirës tjetër nga Saranda dhe kemi shkuar, e kam informuar edhe Asanin për këtë ndryshim plani. Ka qenë diçka shumë e bukur”.
Për Shqipërinë në Euro2024 ai tha se “do shkojmë, në radhë të parë do argëtohemi. Kam besim që do kalojmë grupet falë edhe trajnerit. Është ekstra”.
Discussion about this post