Argita Malltezi, vajza e ish-Kryeministrit Sali Berisha, tërhoqi vëmendjen sot gjatë punimeve të Kuvendit Kombëtar të PD-së, pasi u shfaq në podium dhe mbajti një fjalim.
Edhe pse një aktiviste e hershme e PD-së, Malltezi kurrë nuk ishte shfaqur në podiume për të mbajtur fjalime, aq më tepër në Kuvende Kombëtare.
Ndoshta kjo ishte arsyeja që ajo tërhoqi vëmendjen e mediave, të cilët e pyetën vajzën e ish-Kryeministrit nëse kishte ose jo ambicie për më shumë se një aktivite e PD?
“Gjithmonë kam qenë pjesë aktive e PD, por nuk kam ambicie për më shumë, është çështja të kesh ambicie, por të bësh atë që duhet të bësh, thelbi i fjalës sime është që të gjithë duhet të reagojnë.
E keqja të vjen butësisht, kur ti mendon se diçka është banale për ditën tëndë. E keqja bëhet imponuese kur ti e ke neglizhuar”, tha Argita Malltezi.
Më herët në një prononcim për mediat kreu demokrat Sali Berisha tha se Argita është një aktiviste e PD që në ditët më të para të themelimit të saj.
“Argita Malltezi mbajti një fjalim si shumë të tjerë aty. Argita Malltezi është një aktiviste e PD-së, që në ditët më të para të themelimit të saj, ka qenë studente. Në këtë kontekst, ajo nuk është ndarë kurrë nga PD. Ky është fjalimi i parë publik i saj në kuvendet e partisë, por kjo nuk do të thotë asgjë më shumë sesa një fjalim në të cilin shprehu si aktiviste e PD-së, mendimet e veta.” – tha Berisha.
Discussion about this post