Në një intervistë për mediat, drejtoresha e komunikimit të “Foltores”, Floriana Garo, foli për detajet e Kuvendit Kombëtar të 11 Dhjetorit. Ajo ka deklaruar se Kuvendi do të nisë në “Air Albania” dhe do të përfundojë në selinë e PD-së, duke konfirmuar se Kuvendi do të nisë në orën 10 të mëngjesit.
“Do mbahet në “Air Albania”, do të nisë rreth në orën 10. Janë mbledhur rreth 5200 firma të delegatëve. Delegatët që kanë firmosur të jenë në një zonë krejtësisht të veçuar nga pjesa tjetër e simpatizantëve, anëtarëve dhe të gjithë atyre që duan të jenë prezent. Kuvendi do të nisë në Air Albania dhe do të përfundojë në selinë e PD-së. Duam t’i sigurojmë sa më shumë transparencë mediave dhe anëtarëve” – tha Garo.
Më tej Floriana Garo, tha se nuk do të ketë Foltore deri të shtunën e 11 dhjetorit dhe se pas 11 dhjetorit nuk do jetë më dy grupime të Partisë Demokratike.
“Të gjitha vendimet do të merren në Kuvend. Qëllimi ynë është të shkojmë në selinë e PD. Por vendimet do të merren në Kuvend. Ky Kuvend do shprehë vullnetin e demokratëve, vullnetin e anëtarësisë. Anëtarësia po merr në dorë fatin e partisë. Pas 11 dhjetorit nuk do ketë më dy grupime, por do ketë vetëm një Parti Demokratike, që shpreh vullnetin e demokratëve, që shpreh vullnetin a anëtarësie. Nuk do ketë më dy grupime të Partisë Demokratike” – u shpreh Garo.
Discussion about this post