Inceneratori i Tiranës, zbardhen detaje nga seanca në GJKKO/ Koka i kërkon ndjesë…

Në GJKKO po mbahet seanca për masat e sigurisë ndaj 15 personave p¥r të cilët SPAK ka kërkuar arrest me burg ose arrest shtëpie.

Mes emrave që ndodhen në dosjen e SPAK lidhur me inceneratorin e Tiranës janë edhe Alqi Bllako dhe Lefter Koka, ndërsa në seancë personat e ndaluar me urdhër të SPAK prej të premtes, kanë deklaruar se kanë kryer vetëm detyrën dhe kanë zbatuar ligjin.

Ndërkohë janë zbardhur detaje nga deklaratat e Alqi Bllakos dhe Lefter Kokës, të cilët gjithashtu përfshihen në dosjet e inceneratorëve të Elbasanit dhe Fierit.

Ish-sekretari i Përgjithshëm i Ministrisë së Mjedisit Alqi Bllako, në mbrojtjen e tij ka pretenduar se për blerjen e makinerisë së birrës me vlerë 119.755 disponon fatura.

“E kam blerë personalisht në Çeki. Disponoj fatura që mund t’jua vë në dispozicion. Nuk kam përfituar blerje të tillë nga Klodian Zoto”, tha Bllako.

Për punësimin e Vladimir Bezhanit, Alqi Bllako tha: “është një kontratë e ligjshme me sektorin privat. As me rregullore as me ligj nuk ndalohet.

Është një nga tre ekspertët më të mirë në republikë sa i përket studimeve për trajtimin e mbetjeve. Paga e personit të punësuar është e ligjshme, sa kohë është e ligjshme s’ka motiv për të ngritur akuzë”.

Sa i takon komunikimeve të disa prej zyrtarëve me Klodian Zoton apo punonjës të kompanisë së tij, të akuzuarit kanë pretenduar se në rastin e ofertave të pakërkuara duhet të ketë komunikim, bisedime e kontakte mes firmës që ka shfaqur interes dhe kontraktorëve.

Gjatë fjalës së tij në seancën ku GJKKO do caktojë masat për të akuzuarit për inceneratorin e Tiranës, ish-ministri i Mjedisit Lefter Koka ka deklaruar se akuzat ndaj tij dhe stafit janë ngritur në bazë të opinionit politik dhe mediatik.

Koka e konsideroi veten si “viktimë” të Berishës dhe Partisë së Lirisë të cilën e etiketon si “partiçkë e vogël”.

“Kërkoj ndjesë gjithë stafit nëse janë këtu për shkakun tim. Ata kanë bërë më të mirën që mund të bënin. Akuzat janë ngritur mbi bazë të opinionit politik e mediatik. Jam viktimë e Saliut dhe e partiçkës së vogël. Ndjesë të gjithë juve (personave që janë akuzuar në dosjet ku ai është pjesë)”, – është shprehur ai.