Kreu i demokratëve Sali Berisha e konsideroi pasditen e sotme si një përligjje të akteve anti-Kushtetuese nga ana e SPAK, kërkesës e depozituar në Kuvend nga Prokuroria Speciale, që kërkon arrestimin e tij.
Berisha tha se me veprimin e sotëm SPAK nuk bëri asgjë tjetër vetëm dublikoi krimin kushtetues të ndërmarrë 1 muaj më parë ndaj tij, duke i caktuar dy masa sigurie, pa marrë më parë autorizimin nga Kuvendi.
“SPAK tani i thotë Parlamentit më përligj aktin tim ashtikushtetues,” deklaroi Berisha në studion e A2Cnn.
I pyetur nëse janë ndërkombëtarët ata që po e “godasin” apo kundërshtari i tij politik, ish-kryeministri citoi një deklaratë të bërë më herët nga Edi Rama, sipas të cilit, reforma në drejtësi është bërë nga mazhoranca socialiste dhe jo nga amerikanët apo europianët.
“Ai u zotua në një fjalim mbi 35 minuta, që nuk ka të bëjë me anglo-amerikanët, por është vepër e PS. Unë s’kam pse të merrem me njeri tjetër, veçse me Edi Ramën. Me këtë opozitë që po i bëjmë, e sheh se i ka ditët e shkurtra”, tha Berisha.
Sipas tij, SPAK mund të ketë mbështetjen e SHBA-së, por shtoi se asnjë institucion në shkelje të ligjit, nuk mund të mbështetet.
Por si do ta votojnë deputetët e opozitës kërkesën e Prokurorisë për “zhveshjen” e tij nga mandati i deputetit?
Sali Berisha, bëri të ditur se deputetët e tij do të vijojnë mosbindjen civile, pra nuk do të marrin pjesë në votim. Ndërsa, sa i përket deputetëve të Lulzim Bashës, ai la të nënkuptohej se për votën e tyre “nuk ka asnjë lloj interesi.”
Discussion about this post