Ministri i Drejtësisë, Ulsi Manja, ka reaguar në lidhje me ngjarjen e rëndë të ndodhur në burgun e sigurisë së lartë në Peqin, ku Sokol Mjaca qëlloi për vdekje me armë zjarri, Arben Lleshin, ndërsa plagosi Indrit Shaqan, i cili ishte në të njëjtën qeli me viktimën.
Ministri Manja garantoi familjarët e të dënuarve në Peqin dhe në të gjithë burgjet e vendit, se situata është në kontroll dhe se autori i është dorëzuar drejtësisë.
Ai po ashtu tha se asnjë prej anëtarëve të stafit të burgut nuk i është cënuar jeta gjatë kësaj ngjarjeje të rëndë, e sa i përket detajeve të tjera, ai tha se duhet të presim hetimet që janë marrë në dorë nga Prokuroria e Elbasanit.
“Dua të garantoj familjarët e të dënuarve, që situata është në kontroll. Autori i kësaj ngjarjeje, është një i dënuar me burgim ë përjetshëm, që po vuante dënimin këtë dhe pas kryerjes së krimit i është dorëzuar drejtësisë.
Autori është vënë i gatshëm institucioneve të drejtësisë. Ngjarja është e rëndë, por për asnjë moment nuk ka pasur cënim të jetës së stafeve tona.
Për detaje të tjera duhet të presim rezultat e hetimit.
Për dinamikën e ngjarjes, është çështje që i përket hetimit dhe unë nuk dua të cënoj asnjë element të hetimit.
Pasi të merret në pyetje autori, do të ketë një deklaratë për shtyp, për aq sa lejon hetimi”, tha Manja.
Discussion about this post