Arben Lleshi u ekzekutua sot në qelinë e tij në burgun e sigurisë së lartë në Peqin, ndërsa autori i dyshuar i krimit është Sokol Mjacaj.
Disa orë pas ngjarjes, autoritetet ende nuk kanë dalë me një version për krimin, ndërsa e vetmja deklaratë zyrtare ishte ajo e ministrit të Drejtësisë, Ulsi Manja, që garantonte familjarët e personave që ndodhen në burg, se këto institucione janë të sigurta dhe nuk rrezikohej jeta e të burgosurve.
Në media janë publikuar versione të ndryshme mbi ngjarjen, ndërsa krimi ndodhi rreth 1 orë, pasi ministri i Drejtësisë, Ulsi Manja, kishte firmosur urdhërin që Sokol Mjacaj do të mbyllej në 41bis, për disa ngjarje të mëparshme të ndodhura në këtë burg.
Vendimi i Manjës nuk ishte zbatuar ende për shkak të procedurave, ndërsa Mjacaj arriti të ekzekutonte me një pistoletë që nuk dihet se si kishte hyrë në burgun e sigurisë së lartë, objektivin.
Në raportimet jo zyrtare thuhet se vrasja është porositur nga persona nga jashtë burgut, pra një vrasje me pagesë, për të cilën nuk ka asnjë informacion zyrtar, ndërsa Mjacaj ndodhet në Drejtorinë e Policisë së Elbasanit, ku po merret në pyetje.
Mjacaj ndodhej në burg për vrasjen e dy shtetasve çekë, turistë, të cilët i ekzekutoi për shkak se donte ti grabiste. Më herët Mjacaj ishte i dënuar për vrasjen e një 13-vjeçari, por u dënua me 5 vjet burg, pasi kishte bashkënuar me grupin hetimor duke treguar detajet mbi vrasjen dhe autorët e tjerë të krimit. Sapo doli nga burgu Mjacaj vrau dy turistët çekë.
Me tre vrasje mbi supe, dhe me burgim të përjetshëm, ndoshta Mjacaj është piketuar si një person i përshtatshëm, për ngjarje kriminale brenda burgut. Kjo të paktën shpjegon edhe vendimin e Manjës për ta izoluar atë në 41bis.
Në anën tjetër, Arben Lleshi, që mbeti viktimë, ndodhej në burg, për shkak se ka vrarë një bashkëatdhetarin e tij në Angli, të cilin më pas e dogji.
Referuar raportimeve, 5 vjet më parë, Lleshi u plagos me thikë po në burg, por ngjarja në atë kohë u trajtua dhe u hetua si një sherr mes të burgosurve.
Ekzekutimi i sotëm me armë zjarri, ndoshta tregon se tentativa për ta eleminuar Lleshin në burg ka nisur që 5 vjet më parë, dhe u arrit sot, duke përdorur një të burgosur që ishte dënuar me burgim të përjetshëm.
Lleshaj vuante dënimin përjetë për vrasjen e Agim Hoxhës dhe djegien e trupit të tij brenda një makine, ngjarje që ka ndodhur në vitin 2012 në Britaninë e Madhe.
Kjo ngjarje është pasuar me një seri vrasjesh në fisin apo familjen e Arben Lleshit. Në vitin 2013 u ekzekutua me armë zjarri Xhavit Lleshi, xhaxhai i Arben Lleshit.
Më pas në vitin 2016 u vra Hajredin Lleshi në fshatin e lindjes në Burrel, i cili është vëllai i Xhavitit dhe xhaxhai tjetër i viktimës së sotme Arben Lleshi.
Ndërkohë në vitin 2017 u zhduk pa gjurmë Artan Lleshi, djali i Hajredinit, i cili nuk është gjendur sot e kësaj dite. Të njëjtin fat pati edhe Klevis Lleshi, i cili u zhduk në vitin 2020 dhe eshtrat e tij u gjetën në pronën e dajave të viktimës së shkaktuar nga Arben Lleshi në Angli, Agim Hoxha.
Me vrasjen e sotme të Arben Lleshit nga Sokol Mjacaj bilanci i vrasjeve në familjen Lleshi arrin në 4 të vrarë dhe një tjetër person që është zhdukur pa gjurmë.
Tashmë, i mbetet Prokurorisë të zbulojë se kush e porositi vrasjen e Arben Lleshit, dhe si u arrit që në burgun e sigurisë së lartë të futej një armë zjarri. Versioni i hedhur në media është ai që pistoleta është futur në mjediset e burgut me një dron, por po hetohet edhe pista e përfshirjes së punonjësve të burgut, që mund të kenë lejuar apo të kenë ndihmuar në futjen e armës në burgun e sigurisë së lartë.
Discussion about this post