Një ditë pas ngjarjes së rëndë të ndodhur në burgun e Peqinit, ku i dënuari me burgim të përjetshëm, Sokol Mjacaj, qëlloi për vdekje Arben Lleshin dhe plagosi dy të tjerë, është rrëzuar pista se arma e Sokol Mjacajt është futur me dron në burg, ndërsa ka dyshime se ai nuk ka vepruar i vetëm.
Në dëshminë e dhënë para autoriteteve, Mjacaj ka deklaruar se armën e kishte siguruar më shumë se një muaj e gjysmë më parë. Mes të tjerash i burgosuri me dënim përjetë për vrasjen e dy turistëve çekë ka deklaruar para hetuesve se Arben Lleshin e ka vrarë pasi kishte sherr me të sepse ky i fundit nuk e ka pranuar në sektor.
Por kjo alibi e tij është rrëzuar nga prokuroria, pasi ka dyshime për vrasje të organizuar kundrejt pagesës. Aktualisht në polici janë të shoqëruar 18 punonjës të burgut, civilë por edhe policë.
Dyshohet se arma është futur e plotë dhe dorazi.Një pjesë e kamerave të sigurisë më I.E.V.P., Peqin nuk punonin, edhe skaneri nuk punonte prej shumë kohësh dhe është rregulluar ditët e fundit.
Burime nga grupi hetimor thonë se janë ndaluar 13 persona pjesë e stafit të burgut, që nga drejtori e gjithë zinxhiri komandues. Dyshimet janë se ndryshe nga sa pretendon Mjacaj vrasja të jetë bërë me pagesë.
Discussion about this post