Kryedemokrati Sali Berisha, nga takimi në degën Gjirokastër është shprehur se protesta e thirrur ditën e hënë (18 dhjetor) nuk ka lidhje me imunitetin e tij.
Berisha u shpreh se nuk po protestohet për personin, por kundër grushtit të shtetit brenda shtetit, që sipas tij po e kryen Edi Rama.
Ish-kryeministri deklaroi po ashtu se protestat do të jenë të pandërprera dhe se kanë mision kthimin e votës së lirë dhe rrëzimin e asaj që e quan narkoqeveria Rama.
“Protesta e së hënës nuk ka lidhje me imunitetin tim. Në vitin 2012 kam dërguar në parlament ligjin për heqjen e mbrojtjes së deputetëve. Njeriu që e ka kundërshtuar është Edi Rama.
Kjo që ndodh është grusht brenda shtetit. Të hënën, këta shkojnë në parlament për t’i imponuar Kuvendit vendimin e tyre antikushtetues për rëndim mase, për të treguar se janë larva në funksion të Edi Ramës.
Është poshtërim i Parlamentit, ndaj protestojmë. Nuk protestojmë për personin, por kundër grushtit të shtetit brenda shtetit që po bën Edi Rama. Protestat do të jenë të pandërprera dhe kanë për mision rikthimin e votës së lirë, rrëzimin e narkoregjimit të Ramës.
Jam optimist se kjo do realizohet. Nuk ka diktaturë bande që i ka rezistuar mosbindjes civile”, tha Berisha.
Discussion about this post