Përdhunohet 13-vjeçarja, nën hetim edhe nëna për dhunë ndaj saj

Një 13-vjeçare dyshohet se është abuzuar seksualisht nga një djalë gjashtë vite më i madh se ajo. I riu 19-vjeçar është ndaluar nga efektivët e Komisariatit të Policisë Nr. 6. Ndërkohë që edhe nëna e të miturës është proceduar penalisht pasi akuzohet se e ka dhunuar të bijën, në momentin kur ka mësuar për ngjarjen e rëndë.

“Specialistët për Hetimin e Krimeve në Komisariatin e Policisë Nr. 6 bënë ndalimin e shtetasit E. D., 19 vjeç, pasi dyshohet se para një muaji, ka kryer marrëdhënie seksuale me një shtetase të mitur 13 vjeçe.

Gjithashtu u procedua penalisht nëna e 13-vjeçares, shtetasja R. S., 42 vjeçe, pasi ka ushtruar dhunë fizike ndaj saj.

Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme procedurale”- thuhet në njoftimin e policisë.

Akoma nuk dihen rrethanat e kësaj ngjarje të rëndë, ndërsa grupi hetimor dhe policia po hetojnë për të zbardhur më tej këtë skandal.