Si bashkëpunuan i “forti” i Sukthit dhe ish-shefi i komisariatit për vrasjen…

Detaje të reja dalin pas arrestimit të të “fortit” të Sukthit, Rexhep Kepit, i njohur si Kep Arapi dhe lidhjet me ish-shefin e komisariatit Dedan Gjoni, i cili nxori në pritë një shtetas për llogari të një grupi kriminal. Porosia për vrasje erdhi nga Holanda

Pak orë pas arrestimit të të ashtuquajturit i “forti i Sukthit”, dalin detaje të tjera ku rezulton se ish-shefi i komisariatit numër 6 në Tiranë, Dedan Gjoni, është përfshirë në një tjetër ngjarje kriminale.

Sipas SPAK, emri ka dalë në SKY ECC, në biseda me Dedan Gjonin, i cili është arrestuar më herë në kuadër të një tjetër dosje penale, ku në pranga ranë zyrtarë dhe ish-zyrtarë të policisë.

Nga hetimet rezulton se Dedan Gjoni është përfshirë edhe në një tjetër ngjarje kriminale, ku një grup, ku ishte edhe Kep Arapi, i kanë kërkuar Dedan Gjonit, se si mund t’i nxirrte në pritë një person me të cilin ata kishin konflikt dhe nuk po e gjenin se ku ishte.

Sipas të dhënave, ai ka nxjerrë në pritë një person për llogari të Kep Arapit. Sipas të dhënave, ish-drejtuesi i policisë, Dedan Gjoni, e ka thirrur në komisariat dhe më pas Gjoni ka lajmëruar anëtarët e grupit kriminal duke u nisur foto dhe orarin dhe në këtë mënyrë ka nxjerrë në pritë shënjestrën, i cili fatmirësisht ka arritur të mbijetonte.

Shënjestra e atentatit me armë zjarri në Shijak ka qenë Xhevdet P., i cili njihej edhe me nofkën Akili dhe që përdorte rreth 25 identitete.

Burimet bëjnë me dije ai drejtonte trafikun e drogës nga Amsterdami.

Rezulton po ashtu se urdhri për të kryer këtë krim të rëndë është dhënë nga Holanda dhe dyshohet se lidhet me prishjen e pazareve të drogës.

Burime zyrtare të policisë së shtetit bëjnë me dije se ndaj Dedan Gjonit është ngritur një akuzë të re dhe se Prokuroria ka kërkuar masë të re sigurie për të. Aksioni është duke vazhduar dhe pritet të jepen detaje zyrtare nga policia.