Ishte një kohë kur kryebashkiaku i Tiranës, Erion Veliaj, bënte sikur interesohej për shtresat në nevojë. Në daljet e tij propagandistike, Lali Eri shfaqej diku duke shpërndarë supë në qendrat sociale e diku duke ndihmuar të moshuarit e vetmuar që të kalonin rrugën.
Nëpërmjet mjeteve të fuqishme propagandistike dhe një ushtrie zyrtarësh bashkiakë që merren me kurimin e imazhit të tij, Veliaj u shit si ai djaloshi me zemër të madhe, që u gjendet personalisht në krah njerëzve në nevojë.
Kaluan vitet dhe Veliajt tashmë nuk i duhen ato shfaqje propagandistike të rëndomta. Ai, falë lejeve të ndërtimit, ka me vete bosët e fuqishëm financiarë, të cilët kontrollojnë edhe median. Ndaj, nuk i duhen aspak “hallexhinjtë”, të cilët, kanë qenë gjithnjë bezdi për pushtetin e tij.
Diçitura: Shfaqjet propagandistike të Erion Veliaj, duke shpërndarë ushqim në qendra sociale
Dhe, vjen një ditë që Erion Veliaj e tregon fytyrën e tij të vërtetë, përballë shtresave më vulnerabël të shoqërisë.
Madje, duke treguar historinë e zonjës Delvina Xhangolli, shprehja më e saktë do të ishte që “tregohet surrati i vërtetë” i Veliajt.
Zonja Xhangolli është person me aftësi të kufizuara, nënë e vetme me dy fëmijë të mitur. Ajo kërkoi nga Bashkia e Tiranës mbështetje për strehim social, pasi vetë ishte në pamundësi ekstreme për të siguruar një çati për veten dhe fëmijët e saj.
Nga Bashkia e Tiranës mori vetëm heshtje vrastare. Pas kësaj heshtjeje, Xhangolli fitoi të drejtën në Gjykatë. Sërish heshtje nga Bashkia, e cila nuk zbatonte një vendim të formës së prerë.
U desh të kalonte mbi dy vjet që Veliaj të “vinte dorën” në zemër dhe t’i jepte familjes Xhangolli të drejtën, që u takonte me ligj dhe me vendim gjyqësor të formës së prerë.
Historia e trishtë e zonjës Xhangolli
Delvina Xhangolli, një nënë e vetme me dy fëmijë nën përgjegjësi dhe me të ardhura shumë të ulta, në Shtator të vitit 2021, i drejtohet Njësisë Administrative nr.11 të Bashkisë së Tiranës, me kërkesën për të përfituar nga programi i strehimit social.
Kërkesën e shoqëron me dokumentacionin, që provon se ajo plotëson kriteret e parashikuara nga ligji “Për strehimin social”, për të përfituar këtë mbështetje nga Bashkia e Tiranës.
Ky ishte hapi i parë i një historie plot ece-jake, ku zonja Xhangolli u desh të përballej me mungesën e plotë të humanizmit nga Bashkia e Erion Veliajt.
Njësia Bashkiake e dërgon kërkesën e Delvina Xhangollit tek Drejtoria e Përgjithshme e Shërbimeve Sociale në Bashkinë e Tiranës.
Kjo drejtori, në Tetor 2021 konstaton se zonja Xhangolli nuk mund të përfitojë. Dhe, ky qëndrim justifikohet me një rekomandim të përgjithshëm të Kontrollit të Lartë të Shtetit, i cili i kishte sugjeruar Bashkisë së Tiranës që të tregonte efektivitet në aplikimin e programeve sociale.
Këto terma ishin tërësisht të pakuptueshëm për Delvina Xhangollin, ose, më saktë, ishin të papranueshëm për kushtet në të cilat ajo gjendej.
Ajo nuk tërhiqet nga kërkesa e saj. Në datën 28.10.2021, Delvina Xhangolli së bashku me të bijën iu drejtuan me kërkesë-padi Gjykatës Administrative të Shkallës së Parë Tiranë, duke kërkuar plotësimin e nevojave për strehim nga subvencionimi i qerasë dhe sigurimin e padisë, duke kundërshtuar njëkohësisht aktin administrative të Bashkisë së Tiranës, në bazë të të cilit ajo ishte skualifikuar nga përfitimi i bonusit për strehim social.
Në gjykim, zonja Xhangolli parashtroi se martesa e saj është zgjidhur me vendimin nr. 33, datë 11.03.2002 të Gjykatës së Rrethit Gjyqësor Gramsh dhe ka në ngarkim dy fëmijë; plotëson kushtet e ligjit nr. 22/2018 për përfitimin e strehimit social; është e pastrehë; nuk disponon asnjë lloj pasurie; është person me aftësi të kufizuara; të ardhurat e saj janë të vetmet dhe shumë të ulëta.
Ndërkohë, subjekti i interesuar, Bashkia e Tiranës, nuk ka dorëzuar asnjë prapësim me shkrim dhe nuk ka marrë pjesë në gjykimin e çështjes, duke u zhvilluar gjykimi në mungesë të këtij subjekti.
Në përfundim të shqyrtimit të çështjes, me vendimin e datës 03 Shkurt 2022, Gjykata Administrative e Shkallës së Parë Tiranë ka vendosur “pranimin e kërkesë-padisë; shfuqizimin e aktit administrativ nr. 39200/1 prot., datë 20.10.2021 të DPSHS-së; detyrimin e Bashkisë së Tiranës për plotësimin e nevojave për strehim përmes subvencionimit të qirasë për kërkueset, sipas formularit të depozituar në njësinë administrative dhe udhëzuesit operacional për programin social të strehimit, të miratuar me VKB-në nr. 10/2020”.
Diçitura: Vendimi i Gjykatës Administrative, që detyron Veliajn të paguajë bonusin e strehimit për Delvina Xhangolli
Sipas gjykatës, kërkuesja kishte paraqitur në gjykim prova që vërtetonin plotësimin e kushteve të parashikuara nga neni 16 i ligjit nr. 22/2018.
Po kështu, akti administrativ i kundërshtuar ishte i paarsyetuar, pasi organi administrativ nuk kishte marrë asnjë provë për të vërtetuar plotësimin e kushteve të përfitimit nga kërkuesja dhe kishte mohuar të drejtën e saj për të paraqitur dokumente që mund të vërtetonin plotësimin e tyre, ndërsa i padituri nuk kishte kryer procedurën e seleksionimit dhe vlerësimit të aplikimit në përputhje me ligjin, si dhe nuk kishte paraqitur asnjë provë në gjykim.
Vendimi i gjykatës ka marrë formë të prerë në datën 07.03.2022, pasi nuk është ankimuar nga palët.
Veliaj nuk lëshon pe
Në datën 21 Mars 2022, Delvina Xhangolli i është drejtuar një zyre përmbarimi për vënien në ekzekutim të vendimit të Gjykatës Administrative të Shkallës së Parë Tiranë.
Me shkresën e datë 23 Mars 2022 të zyrës private të përmbarimit, Bashkisë së Tiranës i është kërkuar ekzekutimi vullnetar i detyrimit, ndërsa me shkresën datë 08 Mars 2022 të kësaj zyre, Bashkia e Tiranës është njoftuar për fillimin e ekzekutimit të detyrueshëm të vendimit.
Në vijim, në datat 09 qershor 2022, 21 korrik 2022 dhe 30 dhjetor 2022, zyra e përmbarimit ka vënë në dispozicion të Bashkisë së Tiranës vendimin e formës së prerë të gjykatës, duke tërhequr vëmendjen e kësaj të fundit në detyrimin e zbatimit të plotë të titullit ekzekutiv dhe urdhrin e kryetarit e memon nr. 19918, datë 27.05.2022, që shpreheshin për ekzekutimin e plotë të këtij titulli.
Kaluan dy vjet….
Pas dy vjet përpjekjesh dhe rreth një viti që ishte marrë vendim gjyqësor i formës së prerë, vartësit e Erion Veliajt më në fund përgatitën dosjen e Delvina Xhangollit dhe ia dërguan Këshillit Bashkiak për miratim.
Në 17 Mars 2023, Këshilli Bashkiak ka vendosur “plotësimin e nevojave të kërkueses për strehim social, përmes subvencionimit të qirasë për një periudhë 1-vjeçare”. Shuma që iu vu në dispozicion Xhangollit ishte 19.800 lekë në muaj.
Diçitura: Pas dy vjetësh, Këshilli Bashkiak miraton bonusin e strehimit për Delvina Xhangollin
Vendimi bashkiak merrte fuqi për periudhën 1-vjeçare pas miratimit të tij. Askush nuk u interesua se si kishte jetuar Delvina Xhangolli dhe fëmijët e saj të paktën dy vitet e mëparshme, kur asaj fillimisht iu refuzua kërkesa dhe më pas nuk u zbatua vendimi gjyqësor.
Gjithsesi, pas një beteje aspak të barabartë dy-vjeçare, Delvina Xhangolli arriti të sigurojë një bonus për strehim social. Asaj iu desh të luftonte me Erion Veliajn dhe makinerinë e tij të fuqishme bashkiake, e cila jo vetëm nuk tregon sinjale humanizmi, por, përkundrazi, kërkon të shkelmojë çdo të drejtë të njerëzve në nevojë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post