Juventusi do të tentojë ta mbyllë në mënyrën më të mirë të mundshme vitin 2023, me fitore, teksa Roma e Zhoze Murinjos dhe Romelu Lukakut do të përpiqet t’ia ndalojë hovin “zonjës së vjetër”.
Bardhezinjtë regjistrojnë shifra kampioni deri në këtë fazë të sezonit, 12 fitore, 4 barazime dhe vetëm 1 humbje, ndonëse pozicionohen në vendin e dytë të tabelës (40 pikë), 4 pikë më pak se Interi kryesues. Trendi pozitiv në rezultate mbetet një tjetër komponent shtesë ku vendësit do të shtynë akoma më tepër për t’i vënë vulën fazës së parë me ritëm në maksimum.
SITUATA ME LUKAKUN
Interesante është se në duelin e mësipërm Lukaku ka një histori tejet të ngatërruar me rekordmenët e Italisë. Vetëm me merkaton e verës që lamë pas, Romelu ishte shumë pranë kalimit në “Allianz Stadium”, por marrëveshja mes palëve nuk u finalizua. Tentativa e dështuar la “plagë” në radhët e futbollistit belg, teksa gjeti më pas “strehë” në skuadrën e Romës.
SHANSI I HAKMARRJES
Lukaku ka mundësin e artë t’u dëshmojë tifozëve bardhezinj se çfarë humbën në tregun e transferimeve. Potenca e ishinteristit në kontrollin e topit dhe efikasitetit në zonën mike vlerësohet mjaft nga ekspertët e futbollit dhe Juventusi do të jetë një motiv shtesë që Romelu ta “kafshojë” portën e Sheznit.
Aktualisht pyka e romakëve gëzon statistika vërtet domethënëse pas 14 prezencash me kryeqytetasit e Italisë në Serinë A, 8 gola dhe 1 asist. Finalizimi ndaj Napolit u jep fund dyshimeve se belgu bëhet protagonist vetëm kundër rivalë te lehtë. Përpos këtij aspekti, shënuesi më i mirë i Romës në kampionat do të ballafaqohet me rivalin më të madh në fushë rreth konkretizuesve në katërkëndësh, Dushan Vlahoviç.
U përmend në media se largimi i mundshëm i serbit në verën pararendës do t’i jepet “dritë e gjelbër” kalimit në Torino për 30-vjeçarin, megjithatë nuk ndodhi asgjë dhe Lukaku u detyrua të pranonte “refuzimin”.
Vlahoviç mbart numra më “të zbehtë” krahas “bishës” belge, vetëm 6 gola gjatë 15 paraqitjeve me “zonjën e vjetër” në kampionat. Mungesa e konsistencës në repertorin e futbollistit serb e lë të hapur verdiktin nëse bordi i bardhezinjve veproi drejt me heqjen dorë nga Romelu apo jo.
KËRCËNIMI I TIFOZËVE
Inkuadrimi i Romelu Lukakut me fanellën e Interit vështirë të përtypet nga tifozët e Juventusit, madje u tha se ishte një nga arsyet kryesore se përse ata ia lanë rrugën përgjysëm drejt Torinos. Gjuha e dhunshme e mbështetësve të Juves kundrejt Lukakut i ka “rrënjët e thella” dhe pritet që ata të realizojnë një tjetër shfaqje. Dita e shtunë premton shumë në “Allianz Stadium”, përtej rezultatit, e ku stafeta u kalon lojtarëve për të bërë punën e tyre në fushën e blertë.
Discussion about this post