Deputeti demokrat Ervin Salianji, duke komentuar vendimin e Gjykatës së Lartë, lidhur me vulën dhe logon e PD-së, tha se pavarësisht se çështjen e la të varur në Apel, ajo riktheu vulën aty ku duhet, duke ia hequr atij që e kishte deri më sot, duke nënkuptuar Lulzim Bashën.
Nga Korça, Salianji i ka drejtuar një apel demokratëve që të bashkohen për ta rikthyer PD-në në një parti fituese.
“Ka ardhur momenti që të bëhemi të gjithë bashkë, të forcohemi, të rrimë në terren, të flasim për problematikat e qytetarëve. Gjykata Kushtetuese nuk e pranoi kërkesën e avokatëve dhe Korça si shumë qytete do jetë pa gjykatë Apeli. Do shtrenjtohen kostot, kështu ka ndodhur me dhjetra institucione, biznese që do paguajnë TVSH, ju gazetarë që do paguani 23%, që paratë të merren e ndahen me një grup shokësh”, tha deputeti demokrat.
Ai akuzoi Lulzim Bashën si një prej ish-drejtuesve që në mënyrë brutale po dëmton opozitën për interesa personale.
“Ne kërkojmë zgjedhje të parakohshme në çdo moment, ne jemi të gatshëm të fitojmë. Zgjedhje si herën e parë ku u shfrytëzua përçarja e PD dhe vjedhja, nuk do ndodhin më. Kemi gjithë artilerinë për të mposhtur qeverinë”, tha deputeti demokrat.
Pyetjes se çfarë do të ndodhë me PD nëse për Berishën do të vendoset masa ‘arrest shtëpie’, deputeti Salianji iu përgjigj se këto diskutime i ka kryer sot me strukturat të partisë duke mos dhënë detaje, por duke lënë të hapur një aksin në nivel baze.
Discussion about this post