Sot do të shembet një nga pallatet e dëmtuara në Kombinat si pasojë e dëmeve të marra pas tërmetit të vitit 2019. Më 31 maj do të jenë pallatet e tjera 3 katëshe të cilat janë planifikuar të shemben. Për këto të fundit, banorët kanë bërë rezistencë pasi shprehen se nuk do të braktisin shtëpitë e tyre deri në momentin që të kenë marrë një dokument zyrtar se në cilën banesë dotë shpërngulen.
Për bonusin e qirasë (220 mijë lekë të vjetra) që kanë marrë ata thonë se nuk është i mjaftueshëm dhe se duhet që të shtojnë para nga xhepi i tyre në mënyrë që të gjejnë një banesë të përshtatshme. Pallati i sotëm është gjashti që do të shembet pasi është caktuar i dëmtuar nga ekspertët e Bashkisë Tiranë.
Këtë gjë Petrit Vasili e ka konsideruar një lëvizje mafioze nga ana e Bashkisë Tiranë.
“Banoret e Kombinatit rrezojne Mafien e Bashkise se Tiranes dhe SPAK mbyll syte e veshet! Vendimi i Gjykates Administrative ndaloi prishjen e banesave ne kombinat per interesat mafioze te Bashkise dhe korrupsionit te tmerrshem te saj. Veprimet kriminale korruptive te Bashkise se Tiranes qe perdor edhe fatkeqesine e termetit jane perpara syve te te gjitheve. Per Veliajn qytetaret kane zero rendesi, ndaj ju rremben pronat ne menyre mafioze dhe i le ne mes te kater rrugeve te plaçkitur dhe ne mjerim. SPAK ne menyre te turpshme nuk vepron. SPAK kur nuk vepron per keto skandale kaq te renda inkriminon rende veten. Ja ku i ka SPAK-u fajtoret dhe te korruptuarit, boll ju dha alibi mafiozeve me mosveprimet e qellimshme te tij!”- thotë Vasili.
Një ditë më parë, vetë Gjykata Administrative e Tiranes ka dalë me një tjetër vendim që kundërshton prishjen e ndërtimeve në Kombinat. Gjykata bën të ditur se procesi i rindërtimit të objekteve të shkatërruara nga tërmeti në Shqipëri po ecën jo vetëm me ritme të ngadalta por vendimet për prishjen e ndërtesave kanë ngjallur pakënaqësi te familjet e prekura.
