Ermal Kurtulaj, koordinatori i një prej projekteve që menaxhon Agjencia e SASPAC, në krye të të cilës deri në Nëntor të këtij viti ishte Ilir Beqaj, u përgjua nga SPAK që prej Gushtit.
Hetimi që u regjistrua në 6 Shtator 2023, përfshiu në përgjim dhe vëzhgim ambiental edhe disa persona të tjerë, zyrtarë të kësaj agjencie dhe administrator biznesesh private, si dhe ish-ministrin Ilir Beqaj.
Komunikimet e Kurtulajt, sipas SPAK kanë treguar se si ai kërkonte nga persona të ndryshëm lëshimin e faturave fiktive në mijëra Euro për zbatim të aktiviteteve në kuadër të projektit që koordinonte. Dyshimet e prokurorisë janë që përfitues fundor i fondeve ishte vetë ai.
Por teksa dëgjoheshin këto biseda, SPAK thotë se ka gjetur lidhje të forta mes tij dhe ish-ministrit Ilir Beqaj, që nga përdorimi i mjeteve të Kurtulajt nga ish-ministri, deri në menaxhimin në hije të një biznesi pranë Kalasë së Tiranës.
Prokuroria thotë se ka dyshime që Beqaj, edhe pse ka shitur më herët pronësinë e tij, ka vijuar të kontrollojë këtë biznes nëpërmjet Kurtulajt, i cili mbante kontakte me administratorët ligjorë.
Në kërkesën për kontrolle banese dhe personal që SPAK dorëzoi në gjykatë, argumentonte se ka dyshime që zyrtarët janë përfshirë në korrupsion dhe favorizime në projekte të ndryshme në kohë edhe para këtij hetimi.
SPAK gjeti gjatë kontrolleve dokumente dhe mjete kompjuterike, përfshirë këtu edhe teledonat e ish-ministrit Beqaj, i cili është nën hetim për dosjen e sterilizimit, ku akuzohet për shpërdorim detyre. /Tv Klan/
Discussion about this post