Rama përfshin në Qeveri edhe Blendi Gonxhen, ja Ministria që do drejtojë

Blendi Gonxhe do të jetë pjesë e kabinetit qeveritar, duke mbajtur një funksion ministror. Kjo bëhet e ditur nga Kryeministri Edi Rama, i cili njofton krijimin e Ministrisë së Ekonomisë, Kulturës dhe Inovacionit. Rama i ka përcjellë emrin e Gonxhes për dekretim Presidentit të Republikës, ndërsa Ministria që ai do të drejtojë do t’i shtohet numrit të Ministrive ekzistuese.

Gonxhe ka qenë ndër bashkëpunëtorët më të ngushtë të Edi Ramës gjatë kohës që ai ka qenë ministër Kulture në 1998 dhe më pas në Bashkinë e Tiranës. Gjithashtu ai ka punuar edhe me Erion Veliajn gjatë mandatit të parë si kryebashkiak, deri sa është emëruar drejtor i DPSHTRR-së

Reagimi i Edi Ramës:

Lipset të kalohet sot në një qasje të integruar qeveritare në raport me sektorët e Ekonomisë, Kulturës dhe Inovacionit, të cilat për fazën e re të zhvillimit ku sapo kemi hyrë, duhet të dalin nga kufijtë e ngushtë tradicionalë të qeverisjes së vendit dhe të ndërveprojnë ngushtësisht me njëra-tjetrën, sidomos në kushtet kur teknologjia digjitale ka hyrë si një fuqi e re e kohës në të gjitha fushat e jetës dhe kërkon drejtim strategjik, orientim qeverisës e koordinim ndërsektorial; kur kultura nuk mund të mbetet më një ishull i vogël e i ndarë nga dinamikat e reja ekonomike e sociale të vendit, mbi të cilat ajo ka një potencial të madh ndikues, e prej të cilave ajo mund të përfitojë shumë më tepër; kur vetë sektori i ekonomisë në tërësi kërkon një përmasë të re në frontin e qeverisjes.

Për këtë nevojë strategjike të kësaj faze të re të zhvillimit, kam vendosur ndryshimin e strukturës së qeverisë dhe krijimin e një ministrie të re të Ekonomisë, Kulturës dhe Inovacionit, e cila do të bashkojë në një të vetme pjesët që aktualisht funksionojnë të ndara në ministritë respektive të Financave dhe Ekonomisë e të Kulturës.

* Për drejtimin e kësaj ministrie të re do t’i propozoj sot Presidentit të Republikës, zotin Blendi Gonxhe, një drejtues publik që ka spikatur për reformimin dhe modernizimin mbresëlënës të institucionit, orientimin konstant ndaj inovacionit në funksion të rritjes së cilësisë së shërbimit për qytetarët, shpejtësinë e integrimit të nënsektorit përkatës në kornizën e standarteve europiane.