Është shpresa e Barcelonës, klubi anglez gati të paguajë klauzolën e mesfushorit

Pablo Gavi është cilësuar si shpresa e tifozëve të Barcelonës, pas humbjes turpëruese në Mynih, ku 17-vjeçari shpërtheu në lot.

Ai bëri debutimin për blaugranët në gusht dhe prej atëherë ka treguar karakter dhe saktësi në çdo ndeshje të luajtur. Gavi gjithashtu u bë lojtari më i ri ndonjëherë që ka debutuar për Spanjën në tetor, me një performancë të shkëlqyer në fitoren ndaj Italisë gjysmëfinale të Ligës së Kombeve të UEFA-s.

Me talentin e tij mesfushori nuk mund të kalonte pa u vënë re nga disa prej klubeve më të mëdha të Europës. Ndër to edhe Liverpool, që është gati të paguajë klauzolën rreth 50 milionë euro të spanjollit.

Gavi tashmë është krahasuar me Andres Iniesta dhe trajnerin e tij aktual te Barça, Xavi dhe më parë kanë shfaqur interes Chelsea dhe Bayern, ndërsa tani në garë ka hyrë edhe Liverpool.

Barcelona nuk ka synim ta lërë lojtarin të largohet dhe po tenton rinovimin e tij, ndërsa nuk dihet zgjedhja e Gavit, duke marrë parasysh se ai është rritur në akademinë e klubit.