Lulzim Basha, drejtues i asaj që konsiderohet si PD zyrtare, u shpreh se ish-Kryeministri Sali Berisha po paguan sot sjelljen e tij.
I pyetur se si e komentonte vendosjen e një mase “arresti shtëpie” ndaj liderit historik të PD, Basha tha se në aspektin personal i vinte keq që gjërat shkuan kështu, por kjo ka të bëjë me “faturën” dhe kostot personale që z.Berisha dhe familja e tij kanë marrë përsipër për shkak të zgjedhjes së dy viteve të fundit.
“Më vjen keq personalisht që ndodhi ky arrestim, i ka dhënë një kosto jo vetëm atij personalisht dhe familjes së tij, por edhe Partisë Demokratike.
Por ne duhet të shohim përpara, duhet të shkojmë përpara, jo për të retushuar të shkuarën, duhet të pranojmë të mirat dhe të këqiat, kontributet dhe gabimet, por duhet të shkojmë përpara”, tha Basha.
Ai u shpreh se qëndrimi politik i PD-së është i qartë që drejtësia të bëjë punën e saj e papenguar dhe këtë e kemi treguar me votën tonë, sa herë që SPAK kërkon heqjen e imunitetit për deputetët.
“Kam dy reagime, njëri në rrafshin personal dhe tjetri zyrtar. Në rrafshin personal nuk më vjen mirë që një njeri që padyshim ka dhënë kontributet e veta për vendin të përfundojë këtu.
Çfarë kam thënë për t’i thënë ia kam thënë sepse edhe ai e ka thënë publikisht një pjesë të hapave për të mos ardhur deri këtu. Por, në fund secili bën zgjedhjen e vet dhe duhet të mbajë përgjegjësi për zgjedhjen që ka bërë, kjo është kosto që i ka dhënë familjes së tij dhe pa diskutim Partisë Demokratike dhe vendit. Në rastin personal nuk kam asgjë përveç se keqardhje të thellë.
Nga ana tjetër, Partia Demokratike duhet të ecë përpara dhe të lënë pas të shkuarën, jo ta shkelin atë. Qëndrimi i Partisë Demokratike është që drejtësia të bëjë punën e saj pa u ndikuar. Dhe për këtë arsye kam çuar në Parlament heqjen përfundimtare të imunitetit. Si rezultat kemi rastin Arben Ahmetaj. U deshën dy javë procedura për heqjen e imunitetit, kohë e mjaftueshme për t’u arratisur. Sot dua të komunikoj për heqjen vullnetare dorë nga imuniteti”, tha Basha.
Ai tha se nëse Berisha do të paraqitej në SPAK nuk do të degdisej i izoluar në katin e 8-të, në apartamentin e tij, në arrest shtëpie.
Discussion about this post