Kanë kaluar gjashtë vjet nga vrasja e politikanit serb në Kosovë, Oliver Ivanoviç, ndërkohë rrethanat dhe autorët ngelen ende mister. Oliver Ivanoviç, i cili kishte themeluar dhe po drejtonte Iniciativën Qytetare “Liri, Demokraci, Drejtësi”, subjekt ky kryesor opozitar serb në Mitrovicën e Veriut, ishte vrarë më 16 janar të vitit 2018. Prokuroria Speciale e Kosovës ka ngritur tri aktakuza deri më tani për vrasjen e Ivanoviçit, ku e para ishte ngritur më 2 dhjetor të vitit 2019. Më 30 dhjetor, prokurori i atëhershëm, Sylë Hoxha kishte paraqitur aktakuzën e dytë, të ndryshuar, në bazë të së cilës u mbajt një seancë parapake më 11 shkurt, 2020.
Në këtë gjykim, të akuzuarit Nedeljko Spasojeviç, Marko Roshiç, Rade Basara, Silvana Arsoviq, Dragisha Markoviç dhe Zharko Jovanoviç u patën deklaruar të pafajshëm për akuzat kundër tyre, ndërsa tre të akuzuarit e mbetur, Zvonko Vesellinoviç, Millan Radoiçiç dhe Zhelko Bojiç, ishin në arrati. Ndërkaq, një aktakuzë e tretë është ngritur në nëntor të vitit 2020, pasi Gjykata e Apelit në Prishtinë e kishte hedhur poshtë aktakuzën e dytë të Prokurorisë Speciale, pas kërkesës së palës mbrojtëse, të cilët apeluan vendimin. Më 4 dhjetor, 2020, u vendos që seanca të shtyhet për një javë për arsye procedurale dhe më 11 dhjetor u shty sërish për një kohë të pacaktuar.
Oliver Ivanoviç u vra më 16 janar 2018, me gjashtë të shtëna në shpinë, përpara zyrës së partisë së tij në Mitrovicën e Veriut. Ai ishte bartës i listës “Liri, Demokraci, Drejtësi – Oliver Ivanoviç” në zgjedhjet lokale të Kosovës, të cilat u mbajtën në nëntor të vitit 2017, disa muaj para vrasjes së tij.
Gjatë fushatës parazgjedhore për ato zgjedhje lokale, për shkak të frikësimit të serbëve në veri të Kosovës, katër kandidatë nga lista e tij u tërhoqën, ndërkaq vetë Ivanoviçit iu dogj vetura në Mitrovicë të Veriut.
Përveç në Kosovë, hetimet për vrasjen e Oliver Ivanoviçit janë duke u zhvilluar edhe nga Prokuroria Speciale e Serbisë, por atje hetimet nuk kanë shkuar më larg se sa faza e hetimeve paraprake. Kah mesi i vitit 2019, presidenti i Serbisë, Aleksandar Vuçiç, deklaroi se “Beogradi mendon se e ka emrin e vrasësit të Oliver Ivanoviçit”. Duke iu drejtuar opinionit, ai tha se Millan Radoiçiç, i cili është lidhur me vrasjen e Oliver Ivanoviçit, “nuk ka lidhje me këtë krim”.
Discussion about this post