Kreu demokrat Sali Berisha ka reaguar pasditen e sotme lidhur me qëndrimin e Ambasadave të vendeve kryesore, përfshirë OSBE, të cilat sipas tij, hodhën poshtë deklaratën e pengut të Edi Ramës, Lulzim Bravës.
“Ajo deklaratë e tij tregonte se çfarë shpërfytyrimi, në ç’shkallë është shpërfytyruar ky njeri, i cili shitjen e tij te Edi Rama, aktet e tij të turpshme të diktuara nga pengmarrësi i tyre, kërkoi të ua paraqesë shqiptarëve si autorizim të ambasadorëve të vendeve kryesore në Tiranë.
E vërteta është se ai bëri vetëm mashtrimin e radhës.
Nga ana tjetër të dashur miq, kjo parodi dëshmon edhe njëherë se me Edi Ramën zgjedhje nuk ka.
Se me Edi Ramën ne veç se do të firmosim grabitjen e radhës të votës tonë.
Në këtë aspekt, beteja juaj, beteja e demokratëve është jetike, vendimtare për shpëtimin e Shqipërisë”, tha Berisha, duke iu drejtuar mbështetësve të tij në protestën e rradhës, që zhvillohet në rrugën pranë apartamentit ku prej gati 3 javësh ish-Kryeministri qëndron i izoluar pasi GJKKO ka vendosur masën e sigurisë “arrest shtëpie”.
Ndërsa akuzoi Edi Ramën se zhvilloi me 14 maj farsën elektorale më të shëmtuar, Berisha tha se komuniteti ndërkombëtar publikoi një raport, i cili ju garantoj ju, është fjalë për fjalë, mos më i keq, se sa raporti i zgjedhjeve të Vuçiçit në Serbi.
“Edi Rama bëri gjithçka të asgjësojë opozitën, dështoi në zgjedhje. Bëri gjithçka ta asgjësojë në parlament. Dështoi në parlament.
Bëri gjithçka me organizatën e tij kriminale, skapin e partisë të izolojë Sali Berishën, duke besuar se në këtë mënyrë i dha një goditje fatale opozitës.
Por gaboi rëndë, sepse opozita në Shqipëri qëndron mbi të gjitha, me idealet fisnike të lirisë së shqiptarëve.
Qëndron në dinjitetin njerëzor të shqiptarëve.
Qëndron në dashurinë e madhe për kombin.
Qëndron në dashurinë e tyre për vendin.
Qëndron në vendosmërinë e tyre për një Shqipëri dinjitoze, të lirë, zonjë, një tokë të bekuar.
Ndaj dhe në emër tuaj, ftoj çdo demokrate e demokrat të ngrihet kudo që është në betejë pa kthim kundër këtij armiku, jo vetëm të PD-së, por mbi të gjitha armikut të lirisë dhe pluralizmit politik të shqiptarëve, të qenies së shqiptarëve, të identitetit të shqiptarëve, të sotmes dhe të ardhmes së tyre.
Çdo demokrat dhe demokrate është i ftuar sot të ngrihet në emër të sakrificave që ka bërë gjer sot, të trashëgimnisë së partisë tij, të interesit demokratik dhe atij kombëtar.
Edi Rama është në pushtet vetëm e vetëm për shkak të indiferencës. Ju garantoj se ai përfaqëson një kalbësirë, që shkërmoqet me shpejtësi marramendëse”, tha Berisha.
Discussion about this post