Dy të dyshuarit në lidhje me vdekjen e një 18-vjeçari në Podujevë të Kosovës janë vendosur në paraburgim nga Gjykata e Prishtinës.
Vendimi për dy të rinjtë që përplasën me makinë dhe dhunuan për vdekje Lulzim Fejzullahun u bë me dije nga zëdhënësja e gjykatës sipas mediave në Kosovë.
Pas vendimit të dy janë dërguar menjëherë në burg, ndërsa detajet mbi rastin e rëndë vijojnë të hetohen nga autoritetet përkatëse.
Nga raportet e deritanishme është bërë me dije se Lulzim Zejnullahu ka pësuar lëndime fatale si rezultat i një sulmi brutal.
Pavarësisht përpjekjeve të stafit mjekësor, Zejnullahu nuk arriti të mbijetojë pas plagëve të marra dhe ndërroi jetë të shtunën.
Të arrestuar për vrasjen e 18 vjeçarit janë Eltion Kadriu 16 vjeç dhe Artiol Abdullahu 17 vjeç.
Sipas mediave të Kosovës, dy adoleshentët janë djem biznesmenësh në Podujevë. Besim Kadriu babai i 16-vjeçarit ka në pronësi një biznes makinash me qira, ndërsa Medin Abdullahu babai i 17-vjeçarit është pronar i një kompanie “security”.
Ndërkohë, viktima ishte jetim dhe nuk kishte as nënën e as babanë, por vetëm motrën. Po ashtu mësohet se shkak për konfliktin është bërë radha për t’u qethur në një berberhane.
Në lidhje me ngjarjen kanë reaguar të afërmit e të riut, të cilët tregojnë se si ndodhi ngjarja.
“Unë jam xhaxhai tij. Lulzimi si 18-vjeçar ka qenë punëtor, ka qenë jetim. Pa dy prindërit. E e kanë ndjek me makinë, e kanë shkel, e kanë shtypë e kanë rrëzuar. Kur e kanë rrezuar Lulzimin, e kanë goditur me shkop bejsbolli derisa më vonë ndërroi edhe jetë”, tha xhaxhai i Lulzimit.
Për këtë ngjarje ka reaguar edhe motra e Fejzullahut e cila shprehu dhimbjen për vdekjen e të vëllait.
“Ju kalltë zemra si neve qysh po na kallet, Allah dënoi, kurrë dritë me sy mos pafshin”, ka thënë ajo.
Discussion about this post