Kreu demokrat Sali Berisha artikuloi akuza të forta pasditen e sotme nga ballkoni i banesës ku ndodhet në arrest shtëpie ndaj prokurorëve të SPAK. Pas Altin Dumanit dhe Enkeleda Millonait, Berisha sulmoi Arben Krajën, një prej prokurorëve që po heton dosjen “Partizani”.
Referuar përballjes së ndodhur sot në ambientet e SPAK me prokurorin Kraja, Berisha tha se i ka thënë se nuk mund të jetë aty pasi është në konnflikt interesi.
Por ish-Kryeministri kujtoi se Kraja ishte një nga prokurorët që po hetonte aferën e inceneratorit të Tiranës, por nuk guxoi të marrë në pyetje asnjëherë Erion Veliajn.
“Isha aty sot për ti thënë ish-xhelatit të sigurimit të shtetit shqiptar, Arben Krajës, se ti nuk mund të jesh këtu se je në konflikt interesi.
Sali Berisha me ligj lustracioni të ka nxjerrë jashtë shërbimi në 1996 dhe qëndron këtu në kundërshtim me kushtetutën.
A nuk është ky një hajdut, kriminel, sa Erion Veliaj të cilin ky nuk guxoi ta thërrasë njëherë, ta marrë në pyetje, paçkse janë zhdukur 130 mln euro dhe asnjë objekt nuk është ndërtuar në Sharrë”, tha Berisha
Discussion about this post